梁振輝 香港資深出版人
老梁：老陳，好耐唔見，發咗達唔識人喇！
老陳：老梁，話好發又唔講得，十個八個億都搵到嘅！
老梁：嘩嘩嘩，唔理咁多，「有乜好帶挈」先？
老陳：以前我哋一齊打江山，有好嘢梗關照你嘅！十年前，我響廣西度買咗個大型農場養有機豬，初頭真係「油麻地1」，依家就上晒軌道嘞，你有冇興趣過嚟齊齊「喂2」下豬咁呀？
老梁：過嚟廣西食下狗肉就差唔多，哈哈哈......
老陳：你唔好以為養豬冇出息喎，我響當地不知創造咗幾多就業機會呀！
老梁：乜原來你咁威㗎，我諗遲啲省政府可能會頒個獎狀表揚下你喎！
老陳：身為中國人，貢獻祖國係分內事！其實我一心做生意，勢估唔到「喂豬帶挈狗」啫！
老梁：養豬我始終都冇乜興趣，搞飲食就有。不過聽人講喺內地人脈唔廣就好難搞得成生意！
老陳：老梁，今日你撞番我，你行運嘞！呢幾年，我班細佬妹同埋好多「算盤打唔埋3」嘅親戚就排住隊上嚟搞生意。就憑我嘅人脈，個個都撈得幾掂！嗱，過兩日我孖你上廣西，我介紹曹總過你識，佢係飲食界大佬，如果佢肯出手，「sure win4」喇！
老梁：呢啲咪叫「一人有福，帶挈『成5』屋」囉！多謝先！
老陳：講呢啲！咦，話時話，你咪同老李好熟嘅，而家仲有冇聯絡呀？我以前同佢都好friend㗎，不過都失聯咗好多年嘞！
老梁：嗰條友，自從個老婆「跟佬走6」，佢就「嫖賭飲蕩吹7」乜都齊，見嚫佢都「冇好帶挈」嘅！
老陳：估唔到佢變成咁，都好慘情啫，我仲諗住順便搵埋佢上去廣西玩下㖭！
老梁：見到佢喺對面馬路都掉頭走喇！
與「挈」字相關的常用詞彙有「提綱挈領」和「帶挈」。「挈」文讀「揭（kit3）」；可在口語中，「帶挈」中的「挈」讀「歇（hit3）8」。「帶挈」一詞有提攜的意思。舊時人見面，尤其不見很久，大多會用以下的話語來打開話匣子：
好耐冇見，有乜好帶挈？
對某人說「有乜好帶挈」就是問對方可有什麼好處帶給他。這其實是客套恭維話，聽者會覺得對方認為自己「有境」（生活環境不錯），不然怎可提供好處給你哩。廣東人所說的「冇好帶挈」，指某人的出現會帶來一定的麻煩或損失。舊時生活艱難，賒借難免，所以若有窮友人貧親戚登門，心裡會想：
都唔慌有好帶挈
意指肯定不會有好東西或沒可能帶來好東西。
舊時豬農養狗的，多不會另喂，而是讓狗與豬一同在豬槽作餐，可算是喂豬順便喂狗。比喻做某件事順便關照了另一件事。話說回來，狗在這餵飼模式中搭了「順風車9」（便車）。
「福」指福氣；「有福」可比喻有權勢、有門路、有人脈；擁有了這些特質，好處自然隨之而來。「福」也可借指祝福；試想，有了「有力人士」的祝福，權勢就此建立，名成利就不在話下了。為此，一個人得到了好處，連帶周圍的人也會受益；一個人發了達，周圍相關的人也會騰達；一個人得勢，與他有關係的人也會沾光。這就是：
一人有福，帶挈成屋
（語出《西遊記》一人有福，帶挈一屋）
與此意近的中西諺有：
一人得道，雞犬升天/一人得道，雞犬皆仙
朝上有人好做官/朝中無人莫做官
朝中有人好辦事
Friend at court（庭上有友）
淮南王劉安得道升天，雞犬吃了剩下的仙藥，隨後也升天了；雞犬比喻無德無能的人，所以「雞犬升天/皆仙」含諷刺意味。「朝上有人」、「庭上有友」就是指有具權勢的人做靠山；如是者，那什麼事情都好辦了！
現實生活中，不管是公還是私，很多時如有人在「上頭」打個招呼或為你美言幾句，相關部門一般都會「開綠燈」，事情便會進行得順順利利，高度彰顯了「有福」的重要性。
_________________________
1.「油麻地」位於九龍區，這裡是個借詞，由「麻麻地（讀「麻麻4-2地6-2」）演變過來，而「麻麻」則源自「馬馬虎虎（讀「媽媽呼呼」）/麻麻呼呼」，多用以評價一些還過得去的事物。
2.給動物吃東西時，「喂」同「餵」。
3.「算盤打唔埋」形容親戚關係太疏遠，拿算盤來算也打不上關係。
4.「sure win」，直譯「必勝/穩勝」，即粵語的「贏硬」、「掂硬」；正式寫法是「win for sure」。
5.「成」，文讀「誠（sing4）」，白讀「seng4」。
6.「跟佬走」指背夫偷漢，其後跟他跑了；亦作「跟人走路」，其中「路」讀「佬」。
7.「嫖賭飲蕩吹」分別指「嫖妓」、「賭博」、「飲酒」、「蕩產」（非「遊蕩」）、「吹煙」（非「吹水（胡扯）」），後用以形容人習染了不少不良嗜好，亦簡作「嫖賭飲吹」。「蕩產」指耗盡財產（敗家），「吹煙」指吸鴉片煙。
8.多人把「歇息」、「歇後語」中的「歇（hit3）」誤讀成「揭（kit3）」，尤其後者。
9.搭「順風車/便車」（hitchhiking）指某人請求陌生人用其汽車或其他運輸工具把他/她送抵目的地。在歐美，搭便車的人會在公路旁站立，舉起一隻拇指以示有此需要，通常多被拒絕。
【專欄簡體版】https://leoleung2016.wordpress.com/