主流反對派班大佬近排瘋狂「搞基」又「屈基」，為咗支持「宇宙唯一民主派」劉小麗，係咁口誅筆伐一齊合作咗幾廿年嘅老馮（馮檢基）。咁唔念往日「基情」，連班細嘅都睇唔過眼，唔少區佬同樁腳都覺得唔使去得咁盡，有人拎「Plan B」嘅「你呃人」（李卓人）支旗、轉載老馮參選新聞都唔理劉小麗；有人反問點解「你呃人」又老又空降都得，老馮就要俾人迫退；有人話鬧老馮衰，都凸顯唔到劉小麗嘅好，不如花多啲時間做好自己嘅選舉工作。內部都咁多質疑同意見，到底有邊個信「民主動力」班人話派劉小麗同「欽點」「你呃人」係反對派「共識」呢？ ■香港文匯報記者 陳庭佳
劉小麗前日報名參選時「眾星拱照」咁，嚟得到嘅主流反對派大佬都嚟齊晒，全場都喺度單打老馮。其中，民主黨立法會議員涂謹申就話嘞，佢本來唔使嚟，但係俾「某人」激親搞到佢點都要嚟喎。
李偉峰打對台撐老馮
不過，之後涂謹申「下面」反應就好大嘞。唔好心邪，講緊係佢個助理、民主黨油尖旺社區主任李偉峰，佢喺facebook連出兩個po（帖文），先係po咗幅喺佢嗰區入面嘅自拍，自爆自己落區只係拎「Plan B」「你呃人」支旗，仲加咗「你懂的」、「勿跟車太貼」嘅標籤（hashtag），之後仲些牙（分享）咗《蘋果日報》直播老馮報名參選，但唔見佢有些牙劉小麗報名嘅任何嘢，睇落唔多妥「宇宙唯一」喎。
跟住個po就仲入肉，李偉峰批評班大佬瘋狂「屈基」，諗住咁就可以集中反對派票源：「到今日都仲有人以為×票可以×出51%投票人數！咪×傻，小麗入閘基哥棄選，𠵱家×阿基，叫佢支持者點去大局為重？小麗被DQ，基哥在九西支持度一定比阿人高，唔通又照出阿人？」
佢仲溫提班大佬勿忘初心，「聲言支持民主的人，又可以因個人好惡去矮化市民的被選權與參選權？咁我哋多年爭取嘅係咩？」
質疑只准「你呃人」空降
本身係深水埗區議員、民主黨嘅「Plan C袁（袁海文）」亦都加把口，質疑班大佬攻擊老馮「投共」、為錢先去參選係過晒龍，「基哥堅持參選的原因，更多是他的Ego（自尊心）和憤怒。為什麼李卓人『Plan B』空降九西就無人鬧？為什麼馮檢基轉當新西就人人鬧係罪人？為什麼馮檢基那條窄巷/又傾又砌路線30年不能跑出？為什麼65歲參選就被人罵老？為什麼咁唔公平？越逼（迫）我退，我就是越不退！只有我自己退，你們都逼（迫）不到我退！」
Plan C袁最後向班大佬「進諫」：「既然基哥參選已是必然，大家倒不如努力拉票助選，做好自己，讓最後的結果說話吧！即使有甚（什）麼情緒，也請記住：選票是×不到回來的。」
唔少反對派中人對此似乎都深有共鳴，工黨社區幹事鄭司律，民主黨九龍西支部常委朱子洛、社區主任姚鈞豪、話自己獨立無政黨但fb大大張佢同公民黨黨魁楊岳橋banner嘅社區主任蔡明禧、「法政匯思」前召集人任建峰、理工大學校董會學生成員李傲然等等都按咗讚。
「屈基」不如做好自己
退出咗「街工」嘅葵青區議員周偉雄亦都有同感，喺自己發帖：「睇見網絡世界好多人狙擊個廢柴（指老馮），其實大家都知佢廢，仲花時間畀佢做乜！鬧佢衰，可以凸顯小麗的好嗎？倒不如花多啲時間做好自己的選舉工作吧！」
嗱，今次補選派劉小麗係反對派協調組織「民主動力」決定嘅，老馮「唔係『民主派』」係「民動」創會召集人袋鼠碩（鄭宇碩）同召集人趙家賢「宣佈」嘅，根據「泛民」支持者嘅邏輯，唔撐「泛民」大台就係鬼就係收咗錢，而以上呢幾條友不同程度上無緊跟大隊，「民動」係咪要出吓聲？而出年區選「民動」推唔推薦佢哋睇怕都要諗諗先！