■中出羊子上載咗幅拎住份九西補選報名表嘅相。 fb圖片前年立法會選舉被裁定提名資格無效嘅「獨」人中出羊子，噚日喺facebook上載咗幅拎住份立法會九西補選報名表嘅相，話自己出發去收集提名喎，不過呢條友作風一直騎呢，係咪真係去馬就只有佢自己知嘞。
原名鍾銘麟嘅中出羊子，喺份報名表上面「中文別名」一欄寫咗「好丁小動物」，睇嚟都係惡搞居多，旁邊就擺咗張單張，話要求台灣「收容」被禁止運作嘅「香港民族黨」嘅召集人陳浩天，上面仲大大隻字寫住「守護流亡的幸福」。
佢facebook個封面相片亦都做到選舉橫額咁款，寫上「守護傻人的幸福」、「堅持免供退保 自助餐吃到飽」。一句二句都明顯揶揄緊劉小麗，俾啲咁嘅人狂抽水，可能真係要檢討吓。
喺前年立法會選舉，中出羊子循新界西參選，仲喺確認書度加入「將推動修改或廢除基本法第一條」等陳述，最後選舉主任話佢嘅主張明顯同基本法制定目的同條文不相容，裁定佢提名資格無效。 ■香港文匯報記者 陳庭佳