全力抹黑老馮（馮檢基）但又食到個回力鏢應一應係咩感受，真係要問吓《蘋果日報》同《壹週刊》先知。老馮前日宣佈參選，《蘋果》前日就話佢「反口反口再反口」，噚日整多個頭版招呼佢，話佢喺已報名參選嘅劉小麗「背後插刀」喎。壹仔則整咗幅關係圖「起底」，話老馮同「左派商人」有關係，仲不惜犧牲肥佬黎最力撐嘅民主黨嘅前身之一匯點，結果俾網民踢爆，好多民主黨「大佬」都曾經係匯點成員噃。有人揶揄︰「壹週『發現』馮檢基同『左派』多年來關係密切，但我都『發現』成個『泛民』多年來都同馮檢基關係相當密切。」
曾租葉國華物業就係「左」？
雖然老馮講到明，劉小麗入到閘自己就退選，但「你呃人」（李卓人）以「Plan B」頂上就會競爭，《蘋果》有理冇理噚日頭版話老馮同建制派陳凱欣夾擊劉小麗，仲話老馮「背後插刀」，形容佢「等唔切」下「提早」報名喎。
網民都頂《蘋果》唔順，紛紛留言揶揄鬧爆。「Ôcean Lee」話︰「好似係《蘋果日報》等唔切要出A1頭條抹黑基哥。」「Yavniel Yau」反問︰「蘋果你頭版何嘗唔係一把大刀插基哥？」
「Steven Lee」狠批︰「『毒果』真係好陰毒，馮檢基被抹黑到變咗背後插刀。漠視選舉自由，呢啲係民主派嘅表現？」「Adam Poon」就生動形容老馮處境話︰「基蛋與高牆。」
有啲網民都好清醒，知道老馮根本冇「夾擊」劉小麗。「Thomas Tang」直情話︰「最夾擊劉小麗嗰個喺（係）李卓仁（人）同陳凱欣。關馮檢基咩事，人哋都話如果劉小麗冇被DQ，就退選……蘋果果然不×之（知）所謂。」「李噝噝」揶揄︰「等睇李卓人篤灰DQ『小麗老千』。」
「Ngai Michael」反問︰「其實，你地（哋）『泛民』都講左（咗）馮檢基唔係你地（哋）認為既（嘅）民主派。咁你地（哋）驚咩？又點會𠝹到你地（哋）『泛民』既（嘅）票？定係你地（哋）『泛民』覺得全世界既（嘅）票都係你地（哋）？咁你唔話陳凱欣𠝹票？」
「Alfred Lau」抱不平道︰「明明就係『泛民』喺上次『初選』出爾反爾在先，今次唔搞『初選』又唔當佢係同路人，佢做咩仲要理你地（哋）班×頭先？同埋報名參選，一定係提名期內報名架（㗎）啦，如果政府過左（咗）提名期先DQ你，你地（哋）成班『泛民』咪收得皮？所以『泛民』真係非我族類就係鬼，同極權冇分別。」
更加搞笑嘅係，壹仔噚日都整咗張關係圖，話老馮做民協主席時用友情價租「左派富商」葉國華嘅油麻地單位，而葉國華亦租咗佐敦單位畀「匯點」，仲列埋一啲佢哋認為係建制派嘅「匯點」成員出嚟𠻹。
原來民主黨都有嫌疑
公民黨創黨成員林雨陽見到呢張所謂「關係圖」，都忍唔住加入玩起底，留言話︰「民主黨李華明都係『匯點』。……（19）92到現在，廿幾年嚟你唔話佢『投共』？又同佢合作？！」
其他網民都捉錯處咁玩呢張「關係圖」。「Tony Cheung」揶揄︰「最×好笑既（嘅）係無左（咗）基哥既（嘅）民協依然係廉價租緊葉國華物業做會址，你民協何啓明仲唔係『共諜』？」
「Ching Ho Liu」恥笑︰「多謝壹仔踢爆『匯點』係紅底，聽講『匯點』就係民主黨前身。」「Joey Yam」表示︰「如果話老馮古惑，咁成個民主黨（匯點）就更古惑。」「Thomas Chan」亦話︰「壹仔係夠娛樂性嘅！」
「Wong Lee」好發人深省咁問︰「（傳統反對派與建制派）夾擊馮檢基唔得咩？」其實係得㗎。睇返2015年區議會選舉，《蘋果》咪話老馮被建制派小花陳穎欣同民協前成員黃仲棋夾擊囉，其實老馮都估唔到過幾年後《蘋果》會將佢變成黃仲棋嘅角色㗎。■香港文匯報記者 甘瑜