■劉小麗黑麻麻喺路中心跑，真係唔多安全。 短片截圖反對派成日話自己啲宣傳包裝點醒點勁，不過睇返劉小麗最新嘅一條宣傳片，睇怕都只係得啖笑。補選對手、食衛局前政治助理陳凱欣一早就玩咗呢條橋，佢先好似啱啱瞓醒咁學人跑埋一份，最後仲彈咗句「同香港人一齊跑」，連特首林鄭月娥上年選舉句「同行」都舐埋嚟用。有網民就恥笑話，一睇佢個跑姿，就知佢平時無跑開步！
小麗條片個名「抄考」咗是枝裕和電影《步履不停》（港譯《橫山家之味》）個名，噚日上載咗上網。
片中，小麗夜麻麻喺馬路中心度係咁跑，仲要喺路口停吓畀攝影師拍吓唔同角度，真係當正條馬路係佢嘅。
不過，最出事嘅係佢路經成班工人開緊工嘅果欄，唔怪得成條片無收到現場聲，如果唔係都好難出到街！
「熱狗」前「首領」狗達（黃洋達）個老婆殘獸胃（陳秀慧）就cap圖話，佢條片同「熱狗」主席蟲泰（鄭松泰）喺2016年時拍嗰條選舉宣傳片好似，當時蟲泰亦係跑步拉票，「姿勢嚟講，一睇就覺得劉小麗從來都唔做運動囉。」
網民譏似師奶追車
唔少網民都唔係好欣賞呢條橋。「Janice Tang」揶揄：「睇佢雙手fing fing（揈揈）吓咁，師奶追車咁。」「Cheng Cheuk Kan」就乘機擦蟲泰鞋兼寸小麗：「2016年條片，主席跑得好出力，明顯有力量好多。而劉小麗就好似力量不足，跑到好似要做物理治療嘅人咁......」 ■香港文匯報記者 陳庭佳