■「狙擊政棍小隊」踢爆鄒穎恒原來係老馮個徒弟。 fb截圖可能喺班「泛民集團」眼中，利益點都重要過良心啦。話說鴿黨（民主黨）區議員鄒穎恒日前就幫劉小麗拉票，結果就俾網友踢爆佢以前原來係民協成員，不過就為咗上位而過檔去鴿黨。本身人來人去就都算常見，但原來當年鄒穎恒可以選到做區議員，全靠民協區議員覃德誠交個區畀佢，師父仲要係老馮（馮檢基），結果攞完着數就走人，都咪話唔現實。𠵱家佢仲幫成日打壓老馮嘅劉小麗去「守護幸福」，唔怪得之一大班網民都鬧佢反骨。
為咗支持「宇宙唯一民主派」嘅劉小麗，成班反對派梗係都上下動員撐佢，鴿黨亦少不免要幫拖，日前鄒穎恒就聯同鴿黨Plan C袁（袁海文）一齊落區拉票，仲話要「守護平凡的幸福」喎。
繼承民協選區 轉身過檔鴿黨
不過，fb專頁「狙擊政棍小隊」就發帖狂鬧鄒穎恒係反骨政棍，踢爆佢2015年以民協成員身份當選深水埗區議員，仲爆：「佢嘅選區並唔係由自己打返嚟，而係另一位民協區議員覃德誠冒住風險轉戰其他區，交個區畀佢接手。」
雖然鄒穎恒係因為民協先選到，但佢轉個頭就攞住着數走佬。民協喺2016年立法會選舉冇埋唯一嘅議席，又爆發退黨潮之後，鄒穎恒眼見民協失勢，拎到議席嘅佢就即刻華麗轉身過檔去鴿黨。
專頁仲話：「如果一個政治人物好有抱負，佢覺得自己同黨嘅理念分歧大，咁退黨都好正常嘅，但就唔適合放喺呢個例子囉，因為鄒穎恒議員曾經喺接受訪問時（圖底）話民協同民主黨嘅理念唔係相距好遠喎。」理念差唔多都要過檔，咁係為咗乜？唔使講咁白啦啩？
叫老馮做師父 現幫對家造勢
專頁又爆，原來鄒穎恒係老馮嘅徒弟，而佢亦有幫老馮手搞地區活動。口口聲聲叫老馮做師父，但𠵱家就轉個頭去幫師父口中嘅「大佬文化」劉小麗去造勢，你叫老馮又情何以堪呀？
見到鄒穎恒拎完民協議席就鬆，仲要背叛一路帶住佢嘅師父咁反骨，網民梗係鬧爆啦。「Ng Alex」就話：「既然唔差幾多，點解要跳槽？既然唔差幾多，點解舊大佬俾新大佬圍插時，唔幫舊大佬出句聲？反骨就係反骨，講乜×都假。」
參加過上次立法會九龍西補選嘅蔡東洲就覺得鴿黨都係想做「泛民大佬」：「民主黨專係（喺）民協挖角，想吞併民協，讓白鴿一黨獨大。」
「Larry Tai」直言冇老馮根本就冇今日嘅鄒穎恒：「沒有馮檢基，鄒穎恒甚麼都不是。你係馮檢基帶出嚟嘅人，而（𠵱）家倒戈去支持小麗老千，真係不堪！」 ■香港文匯報記者 何西