■朱隊友們的專頁長醉於關鍵美夢不願醒，所以建制派笑到最後囉！fb圖片立法會房屋事務委員會轄下跟進橫洲發展項目的小組委員會，在上屆立法會會由建制派議員擔任正副主席。日前，委員會舉行新立法年度第一次會議並改選正副主席，「議會陣線」議員朱凱廸就獲選主席。佢嘅支持者就自high，話咁樣反映咗議會內真係有「關鍵一席」呢回事，但有網民就叫佢哋唔好FF，話其實委員會討論嘅嘢已經「過氣」，建制派根本係捱義氣頂住所以放水，勸告班黃絲唔好興奮過度。
橫洲發展項目的小組委員會有19名委員，其中11個係建制派，反對派就佔8個。日前，委員會舉行今個立法會年度第一次會議，建制派有3人出席，反對派就有4個，所以當原主席麥美娟問使唔使重選正副主席時，朱凱廸見「形勢大好」，當然即時話要，於是開始選舉。
其後，身為委員嘅自由黨議員邵家輝臨投票前衝入會議室，仲提名麥美娟連任，令建制派有4人在席，結果係朱凱廸同麥美娟4:4，需要根據會議常規抽籤，最後朱凱廸贏咗。
敗選殘兵 長醉「關鍵」
成班黃絲梗係即時自high啦，now電視嘅「政情網上行」就特別標出，話「四名泛民無投票」、「七名建制無投票」，「投票很重要」喎。網民「Herbert Chan」亦話：「成日有人話補選既（嘅）位已經不再關鍵。照呢件事睇，其實每一席都係關鍵，所謂關鍵，就係喺千鈞一髮既（嘅）時候發揮作用嘛。所以以後每場補選都唔可以放過！」
蟲泰篤爆美夢：建制一身鬆
不過，睇當日嘅新聞照片，負責抽籤嘅代主席柯創盛，喺抽出朱凱廸時係笑容滿面嗰噃！身為「熱狗」主席嘅蟲泰（鄭松泰）就突破盲腸，喺fb發帖「別再讓『黃絲思維』偷走你的批判思考」，「我當然同意議會大小事一點不可鬆懈，但這些『興奮』是莫名其妙的。大家批判地思考一下，為什麼建制派失去主席一位反而比你顯得高興？」
其實是咁的，橫洲發展項目的小組委員會成立嘅目的，係研究及跟進橫洲發展項目嘅相關事宜，包括反對派不斷炒作嘅、喺2016年爆出運輸及房屋局前局長張炳良同鄉事派「摸底」一事。
不過，呢單嘢其實係反對派捕風捉影炒作出嚟嘅，根本無所謂「官商黑勾結」呢回事，到今時今日自然冇咩人關心，所以建制派就算要再做，都只係為咗捱義氣啫！不過，你呃人（李卓人）喺補選中輸咗，黃絲係要搵嘢興奮自high嘅，去滿足自己嘅玻璃心囉！ ■香港文匯報記者 陳川