古有用明朝嘅劍斬清朝嘅官，今有撻前屆局長個朵喝現屆司長，公民黨副主席陳淑莊係得嘅！話說律政司司長鄭若驊噚日出席立法會會議，回應議員就UGL事件嘅質詢，咁反對派群起而攻之就係預定劇本㗎啦，但好似陳淑莊咁甩皮甩骨又真係幾好笑吓。當鄭若驊答完問題離開會議廳嘅時候，佢就喺位度高叫口號，不過唔知係咪之前反「一地兩檢」反得太落力，佢係咁將鄭若驊個名講錯咗做運輸及房屋局前局長鄭汝樺！
躺着也中槍，網友「Ka Wing Tong」好關心前局長嘅「傷勢」：「個鄭汝樺有冇眼眉跳？」「Roxy Kwan」就話反對派成日講錯嘢，今次已經好叻叻豬：「講三中二，『泛民』都算最成功一次啦。」
「Howard Chan」就認為得閒演吓舞台劇嘅陳淑莊都係做吓諧星啫：「見氣氛咁緊張， 搞吓笑， 大家開心笑吧！！！」「Alex Wu」亦都覺得件事驚嚇得嚟又幾富娛樂性：「有陳淑莊，日日都係萬聖節。」 ■香港文匯報記者 陳庭佳