咩叫神又係你、鬼又係你？民主黨立法會議員胡志偉噚日批評行政長官林鄭月娥喺大灣區規劃一事上被動，鬧對方想喺香港發展創科，但又冇畀人才睇到機遇同平台，擔心吸引唔到人才留喺香港喎。
不過，睇返胡志偉過往言論，佢就曾經話擔心一啲便利措施會變成「輸入專才」嚟香港喎，仲曾經特登拉布阻創新及科技局成立，𠵱家鬧人咁口響，似乎唔啱數喎。
胡志偉噚日對住傳媒回應大灣區規劃一事，起勢鬧林鄭唔做嘢，講到香港留唔到人才。不過，喺2017年嘅時候，當時政府宣佈落馬洲河套區發展創新科技園，提出容許深圳人員以「便利方式」過關，但當時胡志偉就話擔心計劃會變相成為「輸入專才」。再睇埋2015年，政府推出優化人才入境措施，當時胡志偉亦話唔希望件事「有漏洞」，變成內地專才來港喎。
其實真正阻住香港創科機遇一事上，胡志偉都有「功勞」，當年特區政府想成立創科局，多得胡志偉動議用權力及特權法調查高鐵香港段工程延誤及超支，畀反對派有機會瘋狂拉布，當時嘅工黨議員李卓人都直言，拉布就係為咗阻創科局成立囉。
今時今日胡志偉覺得吸引人才咁重要，希望佢之後唔會反口，佢啲反對派盟友唔支持嘅時候，記得鬧埋佢哋嘞。■香港文匯報記者 馬壯