■楊岳橋日前為「關鍵缺席」鞠躬道歉。 資料圖片由「關鍵一席」變成「關鍵缺席」，大批市民、網民過去呢兩年鬧公民黨黨魁戇橋（楊岳橋）都鬧到口臭，估唔到《蘋果日報》噚日都認咗呢個事實，出咗條新聞大字標題話戇橋之前「關鍵缺席」，而討論唔到自己提出嘅「檢討單程證政策」議案，不過最後就兜返底話「致歉之後就係改正嘅開始」囉。網民就唔受呢套啦，鬧爆戇橋已經係唔知第幾次「關鍵缺席」，仲鬧埋《蘋果》偏幫佢𠻹。
戇橋上星期喺立法會大會度「No show」，結果令自己提出嘅「檢討單程證政策」議案未開波就已經直接收皮。戇橋其後解釋話自己當時睇緊《國歌條例草案》記者會直播，一時疏忽先冇到，仲要鞠躬致歉。
不過，反對派班人成日動不動就缺席，有時仲一句解釋都冇，惡啲仲去鬧自己嘅KOL度罵戰𠻹，相比之下戇橋都算有啲誠意㗎啦，噚日再去信向全體議員同議助致歉。除咗聲稱要向各位議員致以深切歉意，又希望議員代為向今次負責資料搜集、提交修正案同撰寫發言稿嘅助理同事，轉達佢真誠道歉喎，而《蘋果》就小罵當幫忙咁報道咗呢件事啦。
網民斥「毒果」雙重標準
你有你特別嘅道歉同報道方式，但似乎網民就唔受落啦。「Yi Lam Tse」揶揄：「臨記都知道自己幾時出場，何況你係主角，專業啲，比（畀）啲戲！」「King Wong」鬧爆︰「你條×街好多次重要時刻失蹤！」「田一科」就鬧《蘋果》︰「其他人道歉就話假同做show，『泛民』政棍道歉就話係正確嘅開始，『毒果』咪又係小圈子自己友。」
2019年首次大會就已經「關鍵缺席」，今次掛住睇電視直播連開會都唔記得，睇怕以後應該喺電視隔籬反而易搵到佢喎！ ■香港文匯報記者 何西