■黃之鋒fb撐違法旺暴。 網上截圖區議會換屆選舉殺緊埋嚟，但反對派嘅所謂「光環」愈選愈冇，唯有花式自製返畀自己。就喺《蘋果日報》將違法旺角暴亂扭曲為「年輕人為捍衛幾粒魚蛋犧牲美好年華」、想幫傳統反對派吸「獨」嘅時候，「中箭（香港眾志）」主席林朗彥亦爭埋一份，寫咗成幾百字質疑點解參加大前晚「港獨」集會嘅「獨人」，以至成個反對派要將件事「簡化」為「保護魚蛋檔」，而唔去講「港獨」，擺明想投「港獨」分子所好。不過，「獨人」袁健恩就留言寸爆，除咗將「中箭」最鍾意講嘅違法「佔領」攞嚟做比較外，仲寸佢與其笑「人」「打飛機」，不如自己都打少啲，認真啲去「溝女」咁話。 ■香港文匯報記者 甘瑜
林朗彥嚿年6月接受傳媒訪問時，就已經扮晒係「本土民主前線」前發言人梁天琦「知己」咁樣，借有人作曲去「歌頌」梁天琦一事，隊班「港獨」分子根本唔明白對方喎。佢當時話，呢啲人咁樣做好可悲：「如果梁天琦在法庭所說的話出於真誠，那天他其實是迫於無奈、時勢或者他人的期待，必須做一件不符合他判斷的事。悲哀的是，仍有人捧他為英雄，卻不了解他真正的想法。......苛刻點說，這是浪費政治犯沒有的自由。」
上周五，《蘋果》想煽情兼漂白旺暴但結果俾人鬧爆嘅嗰幅圖，內容提到︰「曾經有班人為捍衛幾粒魚蛋，犧牲咗人生中最美好嘅年華。」然後又有班「港獨」分子搞埋啲咩「毋忘義士」嘅活動。《蘋果》咁玩，都係想幫佢哋一直支持嘅傳統反對派爭返啲「港獨」分子嘅支持啫。
選票喎，身為一直刻意同傳統反對派隔開嘅「中箭」主席，林朗彥梗係即刻嚟料，喺facebook度貼咗《蘋果》張圖嘅同時，話《蘋果》甚至大前晚搞「港獨」集會嘅「獨人」，都「矮化」咗旺暴咁話。
林朗彥首先話，自己當晚都喺現場，嗰班被形容為「迫於無奈去防衛」嘅「義士」，明明就係佢哋採取主動去引爆衝突。不過，呢個都唔係重點，重點都係唔可以將呢件本身想「港獨」嘅事講成為咗幾粒魚蛋，然後將小販擺檔當成旺暴嘅「成果」。
林踩「本土派」忌諱「失敗」
佢聲言，旺暴入面仲有好多「真相」，包括「反撲國家機器」、「武力起事」同「港獨」嘅理念聯繫，佢仲講白啲反問︰「在那個時空裡，一名擲磚的少年，手臂揮動著（着），腦袋裡想著（着）的會是一名小販嗎。」
講咗咁多去討「港獨」分子歡心，佢最後再踩多腳啲「本土派」一直「很忌諱『失敗』」，所以先將旺暴同夜墟政策措施扣埋一齊喎。
袁健恩拎「佔」寸林「唔認失敗」
睇住呢啲陰陽怪氣嘅「自決派」突然鬧「本土派」，袁健恩亦留言寸返佢轉頭。第一個留言就係針對佢句「本土派」一直「很忌諱『失敗』」去反問︰「想清楚是『本土派』還是全個社運圈子。」
之後，佢又質問，旺暴冇明確目標，點樣計都係「失敗」，兼攞埋「中箭」最鍾意講嘅違法「佔領」出嚟講，話「佔領」爭取普選嘅明確訴求，但最終都唔成功，但成班人咪又成日落區話「佔領」「成功」，「這才是真正不承認失敗呀。」
揶揄林「打少啲飛機」
袁健恩似乎鬧嚟鬧去條氣都未順，又再留言話揶揄林朗彥寸啲「本土派」搞集會係「打飛機」，但明明自己都不務「政」業，「粗皮（鄙）啲講，冇囡咪唯有打下飛機自High囉，......希望大家都打少啲，認認真真去『溝女』啦。」
不過呢，呢個世界冇人阻到「中箭」班人係咁博「港獨派」注意㗎啦，事關「中箭」秘書長河童（黃之鋒）前晚又喺facebook出文同「港獨」分子攀關係，首先要講自己坐過監先，之後就話估唔到放監之後香港政治形勢唔同咗，仲形容旺暴案入面班人係「政治犯」，睇返自己不足百日嘅刑期唔算係咩喎，但希望旺暴班人放監之後，「因我們的付出，看到一個更有希望的香港。」
咁樣抽人哋坐幾年監嘅水，夾硬將人哋付嘅代價當做「光環」套埋落自己個頭度，河童又真係做得出喎。