■反對派咩都賴晒新來港人士，連「左膠」都睇唔過眼。 fb截圖反對派凡事都賴落新來港人士身上都唔係第一日嘅事，喺�哋眼中好似只要削減單程證每日150個限額就可以一了百了咁款。不過社民連常委、職工盟幹事杜振豪似乎就睇唔過眼班自己友，喺fb度分享一篇專訪公立醫院急症室醫生黃樂孺嘅報道，認為公營醫院「爆煲」嘅主因根本不在單程證上，順便仲寸埋之前將問題歸咎於新來港人士嘅「杏林覺醒」黃任匡，揶揄佢講嘢夠爆先博到存在感。
黃任匡日前喺媒體撰文，稱每日150個單程證配額係令醫療系統崩潰嘅原因，又期望政府以港人的福祉着想，檢討單程證配額云云。
不過，似乎連「左膠」都睇唔過眼班反對派將個波卸落新來港人士身上。杜振豪喺fb度分享一篇專訪公立醫院急症室醫生黃樂孺嘅報道，內容講到黃醫生認為公營醫院「爆煲」同每日150個單程證限額冇太大關係，反而關鍵係政府缺乏長遠規劃同完善機制。黃樂孺又話，如果可以知道更多新來港人士嘅資料，就可以喺規劃人口政策、醫療政策、福利及安老政策上做得更好，亦唔會出現「見招拆招」嘅情況。
杜振豪就寸黃任匡，話佢講嘢夠爆先博到存在感：「同是黃醫生，但這些說話當然不會被媒體炒作放大，無hit rate（點擊率）嘛。」社民連「村短」黃浩銘就留言話，有人會認為杜振豪引用個別報章有問題，直言︰「人的智慧，僅止於此。」
其實，早兩日杜振豪都引用咗篇文，指出︰「他們（新來港人士）作為香港社會的少壯生力軍，對醫療服務的需要較少，更非公立醫院主要服務量的來源，又怎能令公立醫院淪陷？要『源頭減人』來避免公營醫療『爆煲』之說，實是想當然矣！」
雖然呢次連「左膠」終於肯講返句公道說話，但明明之前班反對派又好撐仇視內地人嘅「港獨」分子喎，做咩呢次又咁「大愛」幫班新來港人士呀？■香港文匯報記者 何西