■新民黨舉行年宵攤位開幕儀式。香港文匯報記者莫雪芝 攝唔少政黨都會喺年宵擺檔賣吓應節物品，同市民賀歲之餘仲可以籌款，而喺芸芸建制派政黨當中，新民黨喺維園個攤位噚日率先開幕。嚟緊係豬年，佢哋就推出攬枕等多款應節豬年吉祥物，祝願香港豬年百業興旺，社會和諧，諸事大吉。
雖然新民黨副主席容海恩（Eunice）生完囡囡無耐仲坐緊月，冇辦法出席，但就有早前生完第二胎嘅南區區議員陳家珮（Judy）坐完月復出，陪住主席葉劉淑儀同副主席潘國山等人主持開幕儀式，難怪葉太大讚新民黨嘅「生產力」好強！
葉太除咗親自揮筆為市民寫揮春，仲祝願市民身體健康、政府政通人和、立法會諸事大吉，當然唔少得新民黨喺嚟緊11月區議會選舉旗開得勝啦。
唔少人都好關注Eunice產後情況，葉太透露B女到??家都仲未改名，佢都有撻咗幾個名出嚟，其中因為B女爸爸叫袁彌昌，所以建議叫做「袁昌妮」，不過兩公婆就仲話要研究吓。至於會唔會鼓勵Eunice今年再下一城生多個，佢就話對方仲學緊做媽媽，畀啲時間尨A應吓。
Judy亦話自己不時有同Eunice溝通，包括分享同陪月員相處之道，好似係餵奶等嘅分工要預先傾好，咁就冇咁多問題出現嘞。■香港文匯報記者 鄭治祖