大家都做地區服務，有時派吓優惠畀街坊，都係關懷嘅一種，但反對派自己做就「理所當然」，建制派做就抹黑做「蛇齋餅粽」。話說被揶揄為立法會資訊科技界議員莫乃光隻「狗」嘅「前線科技人員」日前就出咗個post，又想揶揄建制派社區幹事派街坊洗手液。點知反對派想參加大南區補選嗰個都有派清潔用品喎。按照反對派嘅邏輯，唔通反對派又係「蛇齋餅粽」、涉嫌賄選？
話完人「賄選」 自己友點算？
「前線科技人員」日前就出咗個post，揶揄經民聯社區幹事李思敏做地區工作，派洗手液益下街坊係「意圖賄選」咁，仲製圖兼整埋設計對白話「我派洗手液又得，蛇宴又得，仲唔使申報選舉經費添（𠻹）！」
不過咁，所謂「蛇齋餅粽」呢，其實做親地區工作都會有嘅，回饋街坊啊嘛，原來日前話要參加大南區補選嘅「社區前進」社區幹事李國權都做埋同一樣嘢，大派街坊清潔用品喎。呢吓回力鏢，真係中到應一應啊。 ■香港文匯報記者 何西