■容祖兒拍演唱會海報。香港文匯報訊 入行廿周年，容祖兒今年將於八月假紅館舉行演唱會，早前祖兒就特別為演唱會宣傳海報飛去東京，非常切合演唱會主題，crazy地用24小時努力超額完成。
今次是二十周年紀念演唱會，祖兒話諗返起當初二十歲第一次喺紅館的感覺真係好crazy，當時佢係唔相信會有人來睇自己演唱會，「咁二十年後嘅今次，係我第十個紅館演唱會啦，crazy就交畀歌迷同觀眾啦，我就負責pretty啦！話就話八月先係演唱會，但係我已經開始準備緊㗎啦，keep好自己身體啦，準備最佳狀態，唱最好的歌，跳最正的舞畀大家睇 ，我希望今次唔好咁瘦，因為累積多年經驗，我發覺做演唱會最緊要係體力同健康，太瘦就冇營養又唔夠抵抗力去戰鬥，所以keep fit 同調理身體係會同步進行，唔會畀自己病。」
另外祖兒又話：「我發覺現在香港人真係一年閒閒地睇十個八個演唱會，所以今次我團隊都會盡最大努力，去製作一個令大家一進場就覺得前所未有，同以往完全唔同的演唱會。目的係畀大家睇到我呢二十年嘅進步囉。究竟會點搞？就係秘密住先，等觀眾入場就會知道點pretty，點 crazy ！」