反對派班人到底係咪真係咁鍾意一邊叫「冤枉」，一邊又唔肯睇判詞呢？早前被裁定罪成嘅「佔中」九犯今日（周三）就會量刑。反對派班人又開始賣小強，發起要喺當晚用燭光撐九犯，堅持自己唔係俾九犯煽惑，希望用咁樣嘅手段去證實佢哋嘅煽惑罪唔成立。
其實法庭之前已經講咗，被煽動者嘅真實意圖根本就完全無關，有網民仲揶揄呢班人話︰「係就全部去自首啦......」雖然九犯會唔會坐監仲未知，但反對派方面已經做好準備，仲話要喺判刑當晚就去預計佢哋會被還柙嘅荔枝角拘留所度點爉燭支持九犯，「我們不能讓九子孤單入獄」喎。
袁健恩嘆豬隊友誤解法例
喂阿哥，你覺得你無被煽惑唔係問題，問題係你哋有冇睇判詞㗎？法官喺判詞度就解釋過，過往案例說明，被煽動者嘅真實意圖係「完全無關」，「煽惑他人犯公眾妨擾」同埋「煽惑他人煽惑公眾妨擾」呢類罪行，只係關注被告，亦都即係九犯嘅犯罪行為和意圖，即被作出有關煽惑時，係咪有意圖或相信如果被煽惑者依從佢嘅主張，被煽惑者就會觸犯公眾妨擾罪。
見到反對派中人自high式咁強調「我沒有被煽惑」，連「佔中」牧師袁天佑個仔袁健恩都忍唔住出post話大家「誤解法例」，「『教唆』、『煽惑』 呢類罪名唔係要達到咗目的先可定罪。只要有『叫』過就入得罪了。」佢仲寸呢班豬隊友完全唔認九犯係主事者，係埋沒九犯嘅「貢獻」。
「Conch Yeung」就寸呢班反對派又嚟做騷，「係就全部去自首啦......」「Jack Ma」揶揄︰「蠋光？我以為去拜神。」「Miles CH」笑言︰「晌（嚮）拘留所外點燭火係咩玩法？」「Davis Man」就模仿話︰「我沒有被煽惑『佔中』，因為我根本沒有犯法去『佔中』！」