■開騷當日適逢是泳兒的生日，她笑指是經過擇日。香港文匯報訊（記者 梁靜儀）泳兒昨日出席記者會宣佈將於10月16日假九展Star Hall舉行《重新感應泳兒演唱會》，當日更是她的生日，她笑言可以有藉口叫朋友買飛當是送給她的生日禮物。
相隔三年再開個唱，泳兒感恩地說：「對上一次開騷已經係十周年演唱會，好感恩出道冇耐就有個人演唱會，過去三年因為狀態唔好，個心好想開，但身體狀況問題做唔到，所以更加珍惜今次，望能保持最佳狀態。」
說到開騷當日適逢是她的生日，泳兒笑指是經過擇日：「本身係想十一月開，但因為啲期問題，經理人話要早少少開，擇咗好日子，個心窒一窒，原來揀咗我生日，冇得話唔好。」她笑謂不介意送飛給朋友睇騷，但今次生日就有藉口叫朋友買飛，當是送生日禮物給她。
自爆兩度跌nude bra
說到生日要開騷，豈不是不能同男友撐枱腳慶祝？她冧笑話：「男友嗰日都要一齊開工，負責我嘅髮型，我成日都揀特別日子開騷，之前試過情人節開騷。（男友有冇詐型？）唔止男友，工作人員都詐型，今次好彩係自己生日。」
泳兒又透露今次的歌衫很靚之餘，都會以安全為主，因她是大汗之人，怕出太多汗會令膠紙不夠黐力，她自爆試過跌了nude bra：「我唔可以着冇吊帶內衣，驚跳跳吓唔見咗啲嘢，之前都試過喺巴士成個nude bra跌咗出嚟，發現到前面輕鬆咗咁！（但你之前預告會性感上陣。）性感唔等於少布，露腳都得，今次啲衫係度身訂做。（夠唔夠膽着高叉泳衣型歌衫？）都夠膽着，唔走光就得。」為了練出廿二吋腰，泳兒表示不單戒吃宵夜，還勤做健身。