■吳敏兒揚言如果立法會選舉攞到過半議席，就會用《僱傭條例》即時解僱噚日「聽聽話話嘅保安」。 吳敏兒fb截圖攬炒派喺社會四處散播仇恨，連立法會保安人員都俾佢哋視為眼中釘。立法會內務委員會噚日終於選到主席，一班攬炒派發難不成又想留難保安，其中理應幫勞工嘅職工盟主席吳敏兒仲喺facebook出post，揚言如果立法會選舉攞到過半議席，就會用《僱傭條例》即時解僱噚日「聽聽話話嘅保安」，仲聲稱要針對「有警察背景」嘅保安𠻹。作為工會中人，咁大聲要用《僱傭條例》對付打工仔，呢啲咪就係典型嘅攬炒派政棍囉。
若拎過半議席 即變無良僱主
吳敏兒噚日喺fb揚言，如果「民主派」可以攞到過半議席，第一件事就係炒晒噚日所有「聽聽話話嘅保安」，唔俾佢哋做立法會保安任何職位，連掃地都唔請喎。佢仲教路話可以用《僱傭條例》即時解僱，一蚊都唔賠，「有爭議就上勞審（勞資審裁署）見，等佢哋享受下香港先進法治勞審制度。」所謂工會人士，真係隨時都可以變身無良僱主。
吳敏兒仲愈講愈激動，將立法會保安等同「黑暴」，講到立法會有保安就係「縱容黑警維持秩序為名，打壓民選議員為實」喎，揚言只要攞到過半議席，「一定要用盡所有手段斷『黑警』後路。」
吳敏兒個post下都有唔少恐怖留言。「Pete Lai」話︰「同埋（立法會）秘書處成班『奴才』！」「梁俊偉」亦話︰「仲要刑事檢控佢哋，要佢哋坐監！」咩叫有權用到盡、咩叫濫權、咩叫將司法當成政治報復工具，大家睇得好清楚啦。■香港文匯報記者 甘瑜