李慧琼認為倘攬炒派議員有不同想法，可以透過其他途徑尋求裁決。香港文匯報記者 攝攬炒派立法會議員成日喺議會拉布想拖垮香港，但就從來唔會攬炒自己個議席，不過經歷噚日內會選主席，佢哋個議席可能唔炒都唔得，因為一堆「獨派」、激進派對攬炒派嘅表現唔收貨，鬧佢哋成班人行行企企，仲有人摷返攬炒派咁多年嚟冇全力抗爭嘅證據出嚟添。佢哋呼籲大家要杯葛選舉，唔好再妄想呢班「飯民」可以為大家帶嚟轉變。攬炒派睇怕會兩頭唔到岸？
「獨」師鬧「飯民」冇得救
跟得最貼嘅中文大學「獨」講師劉正，噚日就喺facebook專頁「無神論者的巴別塔」度文字直播佢對班攬炒派議員嘅點評，先鬧佢哋點解會畀陳健波入到議會主持選舉，再鬧「民主派會議」召集人陳淑莊帶支咪入去嗌口號當做咗嘢，跟手批評公民黨黨魁戇橋（楊岳橋）成場就手指指、眼望望，充分反映咗咩叫「精人出口、笨人出手」，然後又鬧「熱血公民」鄭松泰坐喺度食花生等。
佢最後總結︰「以呢個進步幅度，應該去到2147年左右，香港『飯民』就會覺醒，正式進入『議會全面抗爭時代』。」可能驚啲人唔明，佢之後再出post話再投票香港就冇得救，認為大家應該杯葛選舉。
網民翻攬炒議員做騷舊賬
網民「Chi Lap Ma」亦大鬧班攬炒派議員做騷，仲數埋佢哋過往冇全力抗爭嘅理據，例如喺2014年違法「佔中」時割席、捉鬼、篤灰；2016年旺角暴亂時譴責暴力；舊年修例風波就搶鏡頭、呃捐款。fb專頁「渾水財經」亦揶揄班攬炒派唔掂，話不如選健身教練做議員好過，仲強調︰「大家要記住，係N年前『泛民』之前支持議事規則先搞到咁。」
望住民建聯李慧琼最終以40比0嘅姿態連任內會主席，攬炒派班受眾民怨四起，睇來攬炒派今次真係有望喺選舉上攬炒成功嘞。 ■香港文匯報記者 甘瑜