由戴耀廷支持者發起嘅所謂「三投三不投」facebook專頁，日前發帖暗寸參加九龍東「初選」嘅攬炒派中人唔守協議，質疑九龍東出五隊爭三席係想分化票源，所以扮晒好心地叫攬炒派參選人「以大局為重」，又呼籲只投前三，「為大局，如果候（參）選人唔肯自己團結，選民們要幫佢地（哋）揀，尊重『初選』結果，ALL IN（全投） 『初選』頭三」（下圖）。好明顯佢哋就係想逼走位列第四及第五嘅「人民力量」譚得志（快必）同民主黨主席胡志偉，連網民都話九龍東一早有協議，最終要睇埋民調先決定出選隊伍，版主明顯係有心誤導人。
叫九東撇甩民調投前三
「三投三不投」先為「初選」落定義，即「所有選區，出選隊伍數目，都係以目標議席數目為上限」，之後再針對九龍東嘅情況，「唯獨九龍東堅持要話『初選』結果唔計數，出5隊再爭過，爭到 9月2日最後民調。」暗指九龍東唔跟大隊係有罪。 「三投三不投」就勸佢哋「希望九東各位候（參）選人都會以大局為重！」但擰轉面就叫所有選民投頭三，「為大局，如果候（參）選人唔肯自己團結，選民們要幫佢地揀，尊重『初選』結果，ALL IN 『初選』頭三」，想飛起位列第四及第五嘅快必同胡志偉，更以「N之內係正選，N之外係後備」為原則，呼籲攬炒派槍口一致對外喎。
然而，有網民揭穿版主誤導他人，「Tsang W. K. Charles」問：「咁版主係咪認為九東應該違反協議，只容許『初選』頭3名報名正選？......九東協議係要睇民調，宜（??）家想唔認數？」於是「三投三不投」死死氣哋回覆稱︰「認數......協議有唔（無）規定選民奉旨一定要投俾（畀）第四第五？ 協議有無規定任何人都唔可以幫頭三名拉票？」
不過，都有好多「黃絲」跟住「三投三不投」嘅節奏走，喺post下面留言鬧爆九龍東。「星子」話：「九東攪（搞）咩呀，又要玩，又唔認數......」；「TK Tsang Tsang」大鬧：「痴×線！三席出五隊？咁洗（使）乜『初選』呀？我只會投『初選』頭三位置。」
立法會九龍東選區的參選人有鄧家彪團隊、黎榮浩、黃之鋒。 ■ 香港文匯報記者 郭家好