■林卓廷（中）前日在沙田擺街站，被網民鬧縮骨唔敢去遊行。 林卓廷fb截圖香港國安法實施後，攬炒派嘅動員能力經已大不如前，就算喺前日吹行雞話要搞嘅所謂「九龍大遊行」，最終都慘淡收場。原來唔歸隊嘅唔淨止有班終於覺醒嘅「黃絲」，就連成日帶隊搞事嘅民主黨議員林卓廷（三白眼）都冇「蒲頭」。三白眼前日就喺facebook自爆，原來佢呢日縮咗喺沙田港鐵站擺街站，連攬炒派嘅「大遊行」都唔參加。唔少支持者都鬧三白眼「仲對得住香港巿民？活動同你地（哋）泛民議員相關喎！定係你哋諗住割蓆？」
唔少想參選立法會嘅攬炒派中人前日都有去所謂「九龍大遊行」打卡，當中更有唔少人被票控違反限聚令，甚至因非法集結、襲警等罪被捕。不過，三白眼就一於懶理，仲喺facebook發帖話：「我今天我與......在沙田『黨』（港）鐵站外收集簽名，希望政府正視民意，還廣大市民選舉權。」
網民批林「唔理市民死活」
之前就一路叫人衝，香港國安法實施後就縮成咁，唔少網民都話佢唔理市民死活。好似「Alice Lo」就問三白眼：「林生，你今日去左（咗）自己街站，咁旺角的市民你就唔理？你同民主黨仲對得住香港巿民？活動同你地（哋）泛民（攬炒）議員相關喎！定係你哋諗住割蓆？自己做？大家仲需唔需要選你哋？我唔想做你隻棋喎！究竟係我哋聽你講？定係你哋要聽我哋講？」「Wan Kim Ming」就話：「阿廷，真係好欣賞你呢一種不理市民死活嘅態度，加油呀。」「Ashley Yeung」都問：「點解唔去九龍監察『警暴』？」「Aron Kwan」就道出原因：「縮骨唔敢遊行。」
有網民就覺得三白眼目前最在意嘅，只會係唔洗（使）選都有得留任。「Tai Wu」話：「無選舉唔緊要！民主黨最重要三個字！有糧出！」■香港文匯報記者 黃書蘭