■「倫敦人妻先生手記」話有「黃店」若「唔係靠個黃字，執左（咗）九世」。 「倫敦人妻先生手記」fb截圖「黃色經濟圈」嘅理念係咪貼錢買難受？支持「黃店」嘅facebook食評專頁「成波之路」日前喺fb大爆龍門冰室（「人血龍門」）啲嘢難食後，隨即俾班「黃絲」鬧佢係「打手」、「hater（酸民）」，但亦有唔少幫襯完「黃店」、親身受害嘅苦主話同佢同病相憐，逐一呻返自己嘅中伏經歷。有網民就話：「真。好多『黃店』堅唔好食，亦有『黃店』做汽車美容（惡過車房），幫襯完想找晦氣，但唔敢。唉！」
「成波之路」被屈「打手」
「成波之路」日前圖文並茂指人血龍門啲嘢食「伏到令人難以置信」，隨即俾班「黃絲」鬧。「成波之路」隨後再發帖慨嘆：「有啲嘢，就算有道理都唔會講得服人。話我係『打手』或者『hater』嘅，我真係得啖笑。」
另一fb專頁「倫敦人妻先生手記」隨後亦發帖話，其實「手足」就算「幫趁（襯）完黃店後一肚氣」，都未必夠膽講，話自己就試過為撐某告急「黃店」，落咗張百幾人嘅單，卻換嚟「客服愛回不回愛理不理，搞到最後deadline（限期）過左（咗）都係搞唔掂，我未為別人製造驚喜，就自己驚左（咗）先。」佢仲話：「我連上網鬧佢都唔敢，大佬，我真係怕×左（咗）你班『青山VIP（精神病患者）』......嗰間野（嘢）早前『光榮結榮（業）』，啲人左一句不捨、右一句懷念，我真係笑左（咗）出聲，咁嘅垃圾唔係靠個『黃』字，執左（咗）九世啦。」
不過，其實有大把「黃絲」都同佢哋同病相憐，唔少網民都輪流講返佢哋嘅幫襯「黃店」慘痛遭遇。「Wan Emrys」話：「前排有間告急，排埋、等埋野（嘢）黎（嚟）用左（咗）兩個鐘，結果得到3串狗也不×無味既（嘅）炸炭串，食果（嗰）下（吓）想喊出黎（嚟），諗緊點解要咁折墮食d（啲）垃圾？」
「Jade Chiu」就話：「我昨日先食完有間點心店，仲要睇完個KOL（網紅）介紹去食，標榜係自家制（製）點心，Wah（嘩）食完真係O嘴（無言），非常吾（唔）得，馬拉榚係好實，腐皮卷個腐皮係未煎好個角位好韌，菜苗餃我食落口一口粉未熟晒......咖喱魷魚咖喱勁稀完全無Jim（沾）到上魷魚。」「Yingyi Lam」都講：「我試過食發霉三文治，好彩食咗一啖就見到，包邊一點點黑色。」
幫襯「黃店」又貴又受氣
除咗啲嘢難食，仲有唔少人話「黃店」嘅服務都好差。 網民「嚴樂洛」咁講：「岩（啱）先至幫襯一間，入到去個店員態度，我以為自己入左（咗）狗屋乞食，但其實我和朋友是因為佢『黃』才去幫襯，2個人食左（咗）500幾，唔係平，做咩我仲要受氣。」
其實唔想受氣咪唔好幫襯囉，民主社會係有得揀㗎，唔知班「黃絲」仲記唔記得呢？ ■香港文匯報記者 黃書蘭