特區終審法院首席法官馬道立日前發14頁聲明，有黃媒就話係「反擊」近日建制派及市民有關改善司法制度嘅報道，但事實上就連「黃絲」都有大把人唔受馬官呢套，不斷鬧司法制度有問題，睇埋唔同平台嘅網民反應，就見到無論「黃絲」、「藍絲」定一般網民，都對馬官嘅回應罵聲不絕，咁問題出自邊個度呢？
黃媒嘅報道經常講到好似只係得「藍絲」先會鬧法庭判決，但事實上「黃絲」對法庭都係一肚怨氣。喺《立場新聞》有關新聞嘅留言區，唔少「黃絲」都留言話唔信任香港嘅法庭。
「Wing Kin Leung」就話馬官︰「講到幾好聽都冇用，現實剛好相反。」「Kel Lai」亦話︰「馬法官呀，你的下屬判案都要一個普通reasonable person（合理嘅人）覺得合理先得㗎。已經不要說政見。」「Wai King Lee」實鬧馬官︰「自己整個司法機構喪失咗地位仲喺度跌落地攞返D（啲）沙。」
唔少不服法庭判決嘅「黃絲」都鬧爆馬官。「黃駿」就話︰「唔係判得唔合我心意呀，而係判得唔合邏輯呀。」「Carlos Au Yeung」亦鬧爆︰「訓（瞓）醒未？仲有法治，好多未審已經唔俾（畀）保釋，已經坐ing（緊）la（啦），×街，您睇下（吓）快必。」
再睇下啲較為中立嘅網民回應。「Belle Ko」質問︰「唔通法官就可以無皇管？」「Yin Chung」亦話︰「如果司法公正，就冇人出聲，應自我找出問題，唔是出聲明就過骨。」
網民：被投訴更要解釋清楚
「Ryan Chan」則大段留言稱︰「馬法官聲稱假如不滿判決律政司有權提出上訴，但馬法官可知一般普通市民面對動輒以『年』的長時間司法程序是金錢與精神上的折騰，更加不要說坐了冤獄，要避免市民受到如斯折騰最重要的是要防止法官『出錯』，對於『出錯』的法官是否有跟進的程序？......當馬法官把投訴說成是公眾『不理解』，那便更加要向公眾解釋清楚來挽回信心，不是一句『你識條鐵咩，你冇資格評論』來回應。」
被歸類為「藍絲」的網民當然亦對暴徒一再被「放生」感到不滿。「Lau Cheong Fu」就質問︰「請問馬倒（道）立先生：是誰讓司法尺度長短不一？是誰漠視司法界以個人政治立場胡亂判案任意妄為？」「Adam Wong」亦指︰「很明顯是縱容暴徒，是法官自己有政治偏向，大家有眼睇，如果司法無政治偏向，大家都唔會出聲，唔係佢話唔係就唔係。」
各路網民都鬧爆，唔少仲係「有理可據」，咁究竟係司法機構有問題，定各路網民都有問題呢？■香港文匯報記者 甘瑜