■CALL4VAN喺fb發咗個似足批鬥文嘅「道歉啟示」。 CALL4VAN fb 截圖「黃店」借黃上位，自然信唔過。好似有「手足」日前幫襯「黃店」叫車公司CALL4VAN送外賣，將38隻片皮鴨由沙田送去九龍灣，本來車程唔使45分鐘，點知就因為司機反鎖咗條車匙喺車內，令啲鴨兩個幾鐘都拎唔到。雖然班苦主仲好心只要求將運費回水，但就反被CALL4VAN喺facebook發咗個似足批鬥文嘅「道歉啟示」，屈佢哋獅子大開口，累到苦主一度俾同路人當係衰客。唔少網民都睇唔過眼鬧爆：「睇完你件事，我決定算數，以後唔用CALL4VAN。」
話說CALL4VAN日前突然喺facebook發帖話：「今晚7時許，客戶服務同事收到一個電話『要求CALL4VAN賠償七千蚊』。事源係咁嘅......今日嘅一單團購，因為車輛故障兼且『車鎖失靈』，令到數十隻新鮮熱辣嘅無辜小鴨『被困』兩小時，少部分團購街坊覺得等候多時最終未有領取......為此我哋向食店、團購搞手以及街坊致歉。」
CALL4VAN個原帖一出，唔少「手足」都以為係有客棄單。「Ofi La」咁講：「係咪全部食物要報銷先？係全部人都棄貨？賠7,000（蚊）係咪即係要CALL4VAN全數負責？如果係因為delay送貨時間，唔應該下下（吓吓）要棄單，溫提噃（翻）客唔係大哂（晒）㗎！」
不過，苦主好快就出嚟解釋，原來佢一早同司機私下傾好，淨係要佢將600蚊運費回水就算，唔明點解CALL4VAN要咁講。「Stephanie Chan」話：「我係呢團搞手......我哋無要求過司機賠晒7,000（蚊），到最後大家街坊都只係要個司機退返運費600（蚊），平台offer一人退返50/100（蚊） Coupon......車輛故障係咩事呢？係司機插咗車匙，落咗車，成架車反鎖咗。」
唔少「手足」都話好嬲，覺得CALL4VAN發帖誤導「手足」，係想推卸責任。「Louisa Yip」就話：「我對你哋（CALL4VAN）好失望，你第一句$7,000好離譜......就係你呢句說話，我哋全部（苦主）俾人覺得係X客，如果你哋要道歉，唔該重寫。仲有因為呢個po（帖），你要再道歉。如果你覺得係我哋錯，無問題，無下次，我係唔會要你啲優惠券，呢啲唔係施捨。」
「Perla Pearl」就覺得：「出一個咁嘅post（帖）屈人X（衰）客。有幾多人會睇留言又睇到客人嘅澄清？你哋所謂嘅道歉完全唔合格。」「Joseph Chiu」都話：「街坊一句都無鬧佢，依（𠵱）家係街坊見到個post（帖）都頂住道氣。......唔係出個post（帖）將件事推返去個客度就當完。」
專狙擊「偽黃」嘅「Anita Wong」就狠批CALL4VAN喺留言時回應呢個問題嗰陣，竟然話有問題應該個客同司機直接deal，傾唔掂數「唯有報警處理......無理由要平台負責條數：「嗱，CALL4VAN客貨車話㗎，雖然錢佢哋係有份賺嘅，但叫佢哋車嗰陣出咗咩問題嘅話，最好你哋自己同個司機deal唔好煩到佢哋，deal唔掂就自己去報警，人哋啲T&C有免責聲明唔關佢事㗎，ok？」
佢仲鬧：「明明就算件事已經私下settle down咗，退返運費就算。但做客人嘅都要有心理準備，C4V會主動出post抹黑你，老屈你要求貨物全額賠償㗎 ！叫得C4V嘅就自己自求多福啦！」
可能見群情洶湧，CALL4VAN隨後連改4次帖文，死撐話「受質疑後再次confirm先發現用字錯誤，好對唔住。」唉，呢啲咪叫攞嚟醜囉！■香港文匯報記者 黃書蘭