究竟有冇國家會做蝕本生意？話說加拿大移民部長門迪奇諾（Marco Mendicino）宣布放寬港人移民嘅新政策，包括加快處理港人留學生嘅簽證申請，並豁免港人申請延長臨時居留權嘅費用。睇落似乎好「優待」港人，但心水清嘅網民紛紛留言踢爆，加拿大今次嘅政策潛藏唔少魔鬼細節，糖衣背後有兩大目的，包括吸納香港嘅高技術人才，同埋填補當地嘅年輕勞動力（見表）。
根據加拿大官方文件，該國將會為港人開設為期最長3年嘅「開放式工作簽證」，只要最近5年內喺認可專上教育機構畢業嘅港人都可以申請，呢種簽證唔使好似現行嘅工作簽證咁，需事先取得僱主證明同海外僱員許可資格，除咗官方列明例外嘅工作，持新式簽證嘅港人幾乎可從事加拿大嘅任何工作。
政策留白多 想填補「咕喱」
不過，唔少網民都發現呢個政策太多留白：加拿大政府或隨時更改規定，以便篩走唔啱心水嘅申請人，例如政策目前冇列明申請者嘅年齡上限、會否設儲蓄門檻，及有香港刑事罪行紀錄或有案底嘅人能否移民等。
有移民顧問近日接受傳媒訪問時就稱新式簽證較舊簽證「吸引」，因為過往唔少喺加拿大升學嘅港人，只要畢業後一搵唔到工就要走，但??家港人喺當地搵工嘅時限長咗，且幾乎可從事任何工作。由於當地欠缺年輕勞動力，只要「唔介意體力勞動」，相信香港年輕人一定可以成功移民喎。
唔少網民對此都唔睇好，事關因為政治因素而想移民加拿大嘅港人，通常都係玩慣歎慣，喺異鄉做體力勞動未必捱得住，所以無論移民嘅港人係專才，定只係想做勞動工作，最終得益嘅都只會係加拿大政府。
當地等入籍居民鬧爆
其他喺加拿大等緊入籍嘅居民亦都強烈反對今次嘅政策，事關當地移民局以防疫為由，今年3月起已經停辦入籍考試，眼見加拿大政府今次為咗做騷，寧願畀港人「插隊」都唔肯復辦入籍試，梗係搞到呢班長期交緊稅畀加拿大政府嘅居民火滾啦。
■香港文匯報記者 雨航