所謂神又係你，鬼又係你，講緊嘅係一向都「雙重標準」嘅攬炒派。深圳市鹽田區人民法院日前決定不起訴「12逃犯」案中嘅兩名未成年人，並將佢哋依法遣送返港，係人都睇得出係寬大處理，點知所謂「12港人關注組」代表、「獨人」鄒家成就抹黑呢個判決係「塑造公平公正審訊」云云。啲網民都唔知妢Q點，懷疑佢係咪想「手足」被判重點，咁樣才合心意。
夥岑敖暉雙標 被窒「想判重啲」
兩名未成年逃犯日前俾內地遣送返港，唔少網民都話判決仁慈、公道。不過，攬炒派就繼續夾硬嚟抹黑內地。好似鄒家成就對傳媒稱兩人返港後「神情緊張」，稱判決是「政治迫害」「塑造公平公正審訊」云云。攬炒派荃灣區議員岑敖暉亦稱兩人返港後「有點呆滯」，想營造一個兩條友「唔知發生過咩事」嘅印象。
攬炒派連不予起訴「手足」都有得鬧，唔少人都覺得佢哋不可理喻。民建聯立法會議員張國鈞噚日就喺facebook發帖話：「判得輕就話你塑造公平形象；判得重就話你政治迫害。呢班人政治上腦，鍾意將任何嘢都曲解成居心叵測。」
網民「湛丹」留言話：「佢係咪想手足判重點，咁樣才合心意。」「Peter Chan」就話：「反對派『公我贏字你輸』咁多年都係咁玩架（㗎）啦。」
至於岑敖暉聲稱兩名未成年逃犯返港後「有點呆滯」，張國鈞亦發帖揶揄佢：「你哋班人平日推啲後生去送頭做炮灰都算，啱啱放返出嚟精神呆滯有幾奇？你估坐監真係會令人生更精彩？我好記得上年睇過一條短片，講個事主明明好勇武，點知一畀人除咗口罩之後就即刻變鵪鶉，咁唔係仲奇咩？」
「Elaine Ng」話：「呆滯唔係正常反應咩？證明兩個細路仲有啲羞恥心，識得反省自己偷越邊境嘅瞞逃行為並不是一個驚天地泣鬼神嘅英雄行為。岑政棍唔該收嗲啦！」「Vincent Chan」就話：「比（俾）呢班政棍搞到前路茫茫，點會唔神情呆滯，唔通仲要多謝你咩！」 ■香港文匯報記者 黃書蘭