李先生：昨日確診人數少咗都鬆咗一口氣，但仍然有唔少漏洞，有反彈可能，好似中環好多外傭聚集，好多唔遵守防疫規定，但你（警察）唔檢控佢哋就唔會驚，就會繼續聚集。另外市民外出慶祝節日亦增加病毒傳播風險，大家留喺屋企過節係最好，希望政府繼續實施嚴厲防疫措施，市民亦要跟足政府指引，先可以盡早清零。
袁先生：就算近日確診人數有回落都唔可以掉以輕心，我屋企今年都未做冬，費事舟車勞頓，增加風險，始終長者同細路仔都係高風險。𠵱家啲外籍人士聚集問題仍然好嚴重，我更加擔心，政府應該要留意吓，現階段大家應該繼續保持自律，做好清潔同防護。
羅婆婆：𠵱家差唔多每逢星期六日就好多人，又唔戴口罩，又周圍掉（口罩）。𠵱家落街買餸都有排行，又唔行得快，好驚有碰碰撞撞整親，所以都早啲出門口。
陳婆婆：唔係好擔心，大部分人都有戴口罩，但都見到有啲人唔合作，除咗口罩周圍走，不過𠵱家要罰錢，應該冇咁大膽。𠵱家啲餐廳多咗人，又逼，所以都係外賣返屋企食。