警方噚日依法拘捕涉嫌違反香港國安法顛覆國家政權罪嘅逾50人，包括攬炒派灣仔區議會主席楊雪盈。由佢牽頭、聯同多名攬炒派成立嘅地區組織「灣仔起步」噚晚透過社交網頁宣布，將即日解散並停止運作，實力演繹乜叫樹倒猢猻散。有網民就話，如果佢哋唔係身有屎又使乜解散呢？
由楊雪盈等多個攬炒派政治「素人」組成嘅「灣仔起步」，喺前年參與區議會選舉，在灣仔區取得多席，包括現任灣仔區議會副主席麥景星，區議員羅偉珊、陳鈺琳、顧國慧、邱汶珊。其中一名成員、中文大學舊生楊子雋喺舊年11月中大畢業禮上，因為涉參與未經批准非法集結被捕，最後獲保釋。
煽動人哋為自己爭利益嘅時候，佢哋從來唔知驚，但噚日佢哋「老闆」被拉後，佢哋立即通過facebook發帖話，決定即日起解散並停止運作，但就話會「以其他方式延續並守護社區」喎。
「自己人」：楊雪盈有冇參與﹖
身為「自己人」，職工盟清潔服務業職工會總幹事杜振豪就發帖質疑：「灣仔起步的決定，與昨日（前日）『民主派』聯合記招的姿態背道而馳（即係『無畏無懼』嗰啲）。究竟這個決定，楊雪盈有冇份參與呢？她在警署中知道此事會有甚（什）麼感覺？」
網民「Edwin San Sin」打趣道：「灣仔剛起步，赤柱就快到。咁快嘅？佢坐國安號吖嘛！」「King Martin」就突破盲腸：「其實你哋係為咗社區服務？定係港府所指的反中亂港組織？如果係為社區及灣仔居民服務點解要解散呢？真係唔明白你哋成立的初心！」「Ming So」不滿道：「做乜要解散，一啲堅持都無，你當初成立時以為呢條路真係好好行咩。」「Peterson William」就揶揄：「即日收皮無吉屎，革命喎，革你腦帽！」
●香港文匯報記者 鄭治祖