攬炒派區議員懶到出汁，每逢新年懶蟲又要現形。講緊嘅係攬炒派油尖旺區議員陳梓維，佢早前透過facebook專頁宣布「年十八啟市」，屈指一算即係3月先再開工。攬炒派「區政聯盟」嘅大埔區議員區鎮樺、區鎮濠就無咁誇張，佢哋日前就喺facebook宣布，新春期間議辦只係「停開10天」。唔少網民都鬧班攬炒派肆無忌憚懶理區務，「大把區議員當選之後影都無！」
早前已創下「街坊有事搵對家」嘅陳梓維，唔知係咪近日監察對手過度勞碌，年廿九先喺fb宣布「收爐」，註明「年十八啟市」。嗱，如果一時間唔知年十八即係幾時，「維維」都有溫馨提示，佢講明辦事處3月1日先對外開放啊。計一計，原來「維維」自製19天長假，係咪恨死全港打工仔呢。
譏陳「唔放到任期結束」
帖文一出梗係惹來瘋狂批評，「Coral Ching」話：「未見過一份工可以放到年十八，真係世紀筍工。下次不如索性寫年廿八，放到去下年。」「Samson Au」就話：「有事搵民建聯。」
「Connie Chan」就問陳梓維：「你做區議員居然有假放？唔放到任期結束？」「William Chan」就覆佢：「你見佢有做過野（嘢）咩？」
有網民則鬧「維維」呃糧支、嘥公帑。「Andy Leung」話：「咁你嘔返14日人工，thanks！」
「Truman Chan」就話：「以佢咁嘅料都做到一屆已經賺到盡啦！」「林子健」都話：「垃圾！爛泥扶唔上壁（柄）！」
可能「維維」小編眼見群情激憤，佢轉頭都喺個帖子度加上註釋，死唔開放唔等於唔做嘢喎。其實此地無銀，不如真係開工好過啦。
區鎮樺日前發帖宣布，佢同區鎮濠嘅議辦初一至初十休息，佢話：「記得上年農曆新年，同事們都無乜點放過假，因為全力撲緊口罩，同埋籌辦緊口罩事宜；所以，今年嘅新春假期，我哋會放番（返）『長少少』，敬請大家見諒。」佢又發帖話：「記得派利是比（畀）我呀！我今年新年無咁忙，如有聚會記住通知我喇！」
諷攬炒區員當選後「影都無」
唔少網民都鬧爆班人懶。「小林誠司」就喺「連登」以「其實有D（啲）區議員係抵×死」為題發帖話：「有區議員可以由初一休到初十，仲爽過打工仔，原來區議會咁×得閒，區氏兄弟，懶過×......」「死性不改！」「武妝小姐（愛侵）」就話：「區議員緊（梗）係搞民生同社區工作咖（㗎）啦，探老人家，基層，派野（嘢）好基本。的確『禮義廉』（民建聯）做區叻過好多新本土區議員，一個二個話自己『黃』就乜都唔做。」「油B世界第尾」都話：「大把區議員當選之後影都無！」
有網民就話攬炒派幫倒忙。好似「兩鬢斑白再等你」鬧區鎮樺兩兄弟：「喺正大埔中心同大元村（邨），但係人影都唔見多隻，淨係識每日copy下疫情啲news周圍喺唔同group（度）post，仲叫人有聚會叫埋你！」 ●香港文匯報記者 黃書蘭