母親節訂晚餐4小時才送到 又凍又難食「手足」斥「執咗夆捸v
「人血龍門（龍門冰室）」不嬲都出名勁伏，好似早前嘅「冰盆菜」、「出潺糕」等，搞到連班黃絲都要耍手擰頭。不過，隨住人血龍門老闆張俊傑早前又喺facebook發帖賣慘，唔少黃絲為咗盲撐，日前都係照訂母親節六人大餐慶節，但結果訂6點要夜晚10點半先送到，仲要蓉蓉爛爛勁難食，令班黃絲叫苦連天。有「手足」就似乎終於醒覺話：「唔抵幫，堅抵X，之前告晒急咁俾（畀）面懲罰你，大時大節搞到咁肉酸，不如執X左（咗）佢啦！」●香港文匯報記者 黃書蘭
前日嘅母親佳節剛過，唔少黃絲噚日喺fb群起聲討人血龍門嘅母親節套餐。「Mky Angus」就喺龍門嘅fb專頁留言話：「已直接取消訂單，你地（哋）冇咁大個頭唔好戴咁大頂帽啦！打電話唔聽唔覆！垃圾！18:00等到而（𠵱）家接近21:00，想點？想同上次間（單）盤（盆）菜一樣？垃圾到你咁，抵你俾人唱啦！」「Ashley Lok」就話：「母親節，母親非常不快樂，你地（哋）說好的7點前外賣，到現在（９點）都未送到，簡直係中伏呀！」「Cat Si」都話：「10點半話送黎（嚟）叫你食晚飯，唔係唔包容，其實應該預計到無法送到就通知客人，好過一家大少（細）坐左（咗）兩個幾鐘都未到，又唔知會唔會隨時到，呢下先無奈。」
「勇於認錯」「死不悔改」
饅頭張噚日則連發4帖抵賴，稱上周六嘅訂單超時係因為「發生食材問題」同「溝通同安排嘅問題」，而母親節出事則係因為「廚房出單機死機」。不過，佢都有認衰咁話：「到了晚上九點幾先重新整理好所有訂單，再送到客人手上已經十點鐘，我哋知道過時過節令客人有咁唔愉快嘅經歷，係不能原諒嘅錯誤，深感抱歉。」仲話畀苦主食返餐「全單八折」喎。「Luanyu Yan Yu Lo」就咁回應：「仲要過尼（嚟）食比（畀）八折！」
fb專頁「倫敦人妻先生手記」就上載咗多張人血龍門近年嘅道歉啟示截圖，分析佢哋嘅無限派伏套路：「事情永遠是這樣：1.有新搞作；2.大家很開心課金；3.華麗核爆；4.老闆道歉；5.大家原諒；6.重覆（複）步驟1」，仲Hashtag「勇於認錯」「死不悔改」。
「蜆帶泥」「睇落似廚餘」
唔少黃絲都話人血龍門已經唔係第一日係咁，齊齊話要割席。「Fu Shing」話：「我尋（噚）日（前日）等左（咗）4個鐘先到，早知唔X叫，下次不如淨係俾（畀）錢佢就算，叫其他店就算，錢就識收。」「Brian Chan」就話：「瓏（龍）門你又一次令大家失望，講真d（啲）野（嘢）已經唔係好食又貴，晚餐等到變左（咗）宵夜，仲要黎（嚟）到凍曬（晒），仲要成日食人血饅頭，我唔會再幫襯瓏（龍）門！」
「肌肉小樹熊」噚日亦喺連登發帖話：「中咗大伏呀，母親節晚餐，我叫咗瓏（龍）門冰室6人餐$1,328，加$100送貨上門。6人餐，我地（哋）6個大人、3個細路都食淨（剩）好多，因為真係太難食，啃唔落。我哋平時唔會浪費食物，食淨（剩）嘅嘢會雪起第二日再食，但呢壇嘢真係攪唔掂，只好倒咗去！」
「瑞士寶」睇完啲相就留言指：「有冇睇到隻蜆啲泥！」「太平紳屎」就話：「睇落似廚餘。」「對琴彈羊」就直情想鬧醒手足：「成1,450（蚊）食呢啲野（嘢）你都弱智......」