■黎汶洛老點災民山長水遠「行」去啟田社區中心。「中箭攝石人」黎汶洛因發文抽殉職高級消防隊長水而被鬧爆，但為了今年立法會換屆選舉，他豈會放過這個「大好」宣傳機會？聲稱有意參選九龍東的他，前晚在火災期間在其facebook發帖稱，其「九東工作團隊」致電得悉藍田（西區）社區中心會開放予受影響人士使用，更「體貼」地教人由九龍灣的得寶「行」到該位於藍田地鐵站附近的中心。不少網民都揶揄，「中箭」似乎無人懂得看地圖兼唔做功課。
神級說明無人識睇
由得寶經彩盈邨天橋行到啟田社區中心？兩者相距4個港鐵站，要行幾多個鐘至到？真係唔識嚇死，識就笑死。在該附有地圖的帖子中，攝石人如此描述如何由九龍灣「行」到藍田：「住得寶附近既（嘅）朋友，你可以經地鐵站往彩盈邨天橋過去，之後再由停車場旁既（嘅）商場入口上去，或者斜路入口都可以入到架（㗎）！」
文字加上圖片，都唔知講咩。網民「Eric Phoebe」就留言道：「上面『得寶附近既（嘅）朋友......』段文字講得唔係太清楚， 開頭看以為由得寶可以行到去（啟田）社區中心， 其實係居民點樣行上九龍灣地鐵站。」「Yim Po Ki」就質疑，「其實唔係點去地鐵站喎，佢講經地鐵站往彩盈。講到尾，唔知佢up乜×！」「Lo Chi Man」就揶揄道：「彩盈邨天橋行去藍田？......香港眾志冇人識睇地圖？」
就算唔提攝石人話要選九龍東，但竟然係「地理盲」，仲要唔做功課就上門「教」人千里走單騎，都已經夠惹笑，原來民政事務處前晚已確認，決定開放離災場較近，位於觀塘振華道的樂華社區會堂供有需要或受影響的居民暫住，攝石仔做咩無厘頭叫人捨近取遠，要特登由九龍灣「行」去藍田的啟田？只能夠講一句：抽水嘅嘢我哋普通人識條鐵咩！■記者 羅旦