■網民以漫畫揶揄劉小麗走數。 fb圖片人稱「小麗老母」嘅劉小麗，喺選舉尾聲為咗挽救選情，開出一大張「捐一半人工」嘅期票，聲稱會開一個「家務義工隊」幫助老人家，同埋會公佈賬目。雖然佢上個月仲未正式就任成為議員，但根據立法會秘書處做法，佢上個月9萬幾蚊人工應該袋袋平安，仲應該喺前日入落佢戶口。唔少人開始對佢「溫馨提示」，叫佢即刻找數，尤以一直狙擊佢嘅「無敵神駒」仇思達最落力，差唔多每個post（帖文）都提起佢，連已經榮休嘅民建聯前立法會議員鍾樹根（根叔）都忍唔住問：「你（小麗）好等錢使咩？」不過，劉小麗又有個名叫「小麗老千」，不但扮係「全民退保」學者方案嘅「倡議人」，又拖網媒職員人工成年咁長，睇嚟老人家對佢嘅期望隨時凍過水！
仇思達追數 樹根都「跟機」
踏正11月1日，仇思達已經急不及待喺facebook「提醒」劉小麗要「毋忘初衷」：「劉小麗，出糧了。請問你幾時兌現選舉承諾，捐出一半人工？」有網民就走去「小麗民主教室」facebook專頁踩場，叫佢快啲捐人工。就連臨老學識玩facebook嘅根叔，都喺仇思達個post度留言，質疑劉小麗「你好等錢使咩！」眼見根叔大駕光臨，仇思達自然打蛇隨棍上，前日傍晚再出post話：「等足大半日都無消息，連根叔都睇唔過眼，劉小麗好快啲公布（佈）捐人工詳情。」
雖然建制派覺得於理不合，但劉小麗尋日仍然可以重新宣誓，背住唔少人個背脊，以30秒讀出上次讀咗十幾分鐘嘅誓詞，趕得切喺「青症雙邪」游蕙禎同梁頌恆衝入會議廳之前完成。仇思達再提多次：「劉小麗，你今日宣誓嘅語速快過上次幾十倍，睇得出你好恨保住個位同份糧。嗱，班老人家就等咗你好耐嘞，你講過要捐一半畀長者受惠㗎嘛，錢呢？」「熱狗」KOL（輿論領袖）之一陳到亦都加把口：「小麗成功達陣，追佢老味捐一半糧！」
拖糧拖成年 走數有前科
劉小麗點解叫「小麗老千」？因為佢真係一個老千！選舉期間，明明自己唔係「2064全民養老金方案」嘅「倡議人」，又話自己係；之後為咗得到「大班」鄭經翰支持，改為提出「免供款退保」，立場一時一樣。明明自己只係喺理大屬下嘅香港專上學院（HKCC）教書，當選之後不停約傳媒喺理大校園訪問，當自己係「正印」。最嚴重嘅係，佢之前學人搞網媒，最後放手唔理，仲爭一個職員人工成年咁耐，選舉期間仲派競選團隊見嗰位苦主，諗住小事化無！ ■記者 陳庭佳
