嘩！原來聲言要「爭取不同光譜支持」、「修補社會撕裂」嘅特首候選人曾俊華（薯片），啲粉絲係可以對住一個支持對家嘅傷健人士大肆人身攻擊，咁嘅修補方法真係令人歎為觀止！護苗基金創辦人、藝人蕭芳芳日前拍片力撐候選人林鄭月娥，一眾「薯粉」同反對林太當選嘅反對派支持者，就針對芳芳姐有耳疾嘅弱點，攻擊佢「聾到智力都無埋」、「又聾又盲」，更加有人抹黑芳芳姐做「芳老巫」，又詛咒佢「老而不死是為賊」！
讚林太 被辱「又聾又盲」
芳芳姐喺段片度都係讚吓林太點幫佢個護苗基金啫，都無踩親薯片條尾，班激進「薯粉」做乜要咒到佢落腳趾尾啫？「Joanne Mok」就侮辱芳芳姐「聾到智力都無埋」，「Jan Leung」更刻薄到話佢「老而不死是為賊」。「李絲絲」就更加賤格：「芳老巫，不單聾，而且盲，人之將死，其言也醜！」
近排靜咗落嚟嘅「熱狗」亦都無端端加把嘴，身為人母嘅「手作達人」吳斯翹（Billie Ng）更話，從芳芳姐呢件事嚟睇，「結論是不要太長命。」
噚日，薯片突然煞有介事地喺伭acebook（fb）度「些牙」（分享）佢個「官方後援組織」「薯仔」嘅fb專頁，介紹一班「薯仔」來自不同政治光譜、不同年齡層，「對解決香港當下面對的問題非常有熱誠」咁話，而睇返「薯仔」嘅專頁，成員都係包括啲睇落好似好正面、好陽光嘅年輕專業人士，裡面啲內容都叫做正正常常。
不過，一向只有支持者「些牙」偶像嘅嘢啫，邊會有偶像「些牙」支持者嘅嘢？薯片煞有介事咁「些牙」法，唔通想間接同咒罵芳芳姐嘅激進「薯粉」劃清界線？如果真係劃得咁間接、無正視問題，又點樣「爭取不同光譜支持」、「修補社會撕裂」呢？ ■記者 陳庭佳