宣誓風波之後，唔少反對派中人都唔太關心所謂「戰友」保唔保得住議席、使唔使破產等，只係掛住可唔可以喺嚟緊補選度搶位。好似民協前立法會議員馮檢基，無時無刻都為自己重返立法會籌謀，但佢一嚟喺上年選舉輸到連按金都攞唔返，二嚟下年就夠秤用兩蚊搭車，自然俾人鬧佢霸住張「政治關愛座」。不過，佢日前接受網媒訪問嗰陣，就嚟一場「網絡挑機」，話要搵個「勝算高」嘅出嚟選，仲反問「馮檢基衰喺邊」，於是網民就響應佢嘅「呼籲」，力數佢究竟衰喺邊，而最多人唔滿意佢一把年紀阻住後生仔上位，同埋係咪要老馮投畀佢老馮！ ■香港文匯報記者 陳庭佳
自從以唯一參選人身份通過民協黨內初選，有機會出戰九龍西補選之後，老馮喺facebook上面嘅「嬲嬲」多到上個頭殼頂度。不過，佢似乎仲未知衰，日前接受網媒訪問嗰陣，就忿忿不平咁反擊一眾網民嘅批評。佢話網民唔明白佢嘅諗法，自己的而且確獲得超過三分二民協會員支持，又話要搵個「勝算高」嘅出嚟選，仲講到如果畀Cheap禎（游蕙禎）選返，「畀返佢，如果贏唔到，補選意義喺邊度？」即係踩低人抬高自己啫。
事後補鑊 稱勝算高者去馬
唔知係咪覺得自己講大咗，佢之後加返頂頭盔，話只係要求反對派初選，同埋「客觀、科學、有代表性」嘅民調，發現邊個勝算高就邊個去馬，唔一定係佢自己咁喎。
唔認「鎅死」李卓人 雙雙攬炒
講到有人覺得佢上年喺新界西「鎅死」工黨李卓人，最後雙雙攬炒，佢就死兜自己錯估形勢，賴咗去朱凱廸得票超出預期同「雷動計劃」度，反問點解要佢食晒隻死貓，仲話自己嗰萬幾票都係上屆民協代表、當時屯門區議員嚴天生嘅票，唔存在鎅走李卓人嘅票。咦？咁咪間接承認自己無吸票能力？
老馮越講越扯火，話如果有網民寧願投畀建制派都唔投畀佢，就要話畀佢聽「馮檢基衰喺邊」，係咪衰做得耐衰年紀大，仲暗寸網民意見無代表性，「我可以開不同賬戶，可以有100個都是馮檢基。」賬戶唔使多，一個民協fb專頁管理員身份就夠啦。
喺訪問出咗街之後，唔少網民都集思廣益，齊齊研究「馮檢基衰喺邊」，有人覺得佢衰在年紀大都霸住個位唔肯世代交替，有人就話民協喺九龍西連香兩屆，老馮自己上年都輸到貼地，今次諗住再選，衰無自知之明。「Wayne Law」更加精警，話老馮衰在要人哋諗唔到佢有乜衰就投佢，「𠵱家啲票你㗎？」