反對派話爭取言論自由、新聞自由，但一遇到報道唔係吹捧佢嘅就懷恨在心，搵到位就入。「香港中箭（眾志）」的秘書長河童（黃之鋒），近日發帖話有口罩、成百支伸縮直幡棍等「剩餘物資」派街坊。有記者就問佢拍檔袁嘉蔚「點解最近會執嘢」，結果佢同河童就出地球post揶揄間報館，仲問第時掃地使唔使出採訪通知喎！
雖然「中箭」扮晒慘，開口埋口要眾籌，但河童近日出帖就話在整理「中箭」會址時，發現有不少「多出」的物資，包括全新伸縮直幡棍100支、口罩27盒等，「希望有朋友幫忙接收」，仲講到明係「贈送物資第一彈」喎。照咁睇，「中箭」都唔係佢口中講得咁窮啫！
記者問一句 河童勁寸嘴
身為「中箭」南區社區幹事的袁嘉蔚其後開地球post，話「因為黃之鋒出左（咗）個free野（嘢）post，就惹來某報記者WhatsApp問我『點解最近會執嘢』，仲問可唔可以出我地（哋）嘅回應。其實香港冇新聞咩？下次我喺Office掃地出份採通吧！」她又標註「下次你執屋我問返你點解」、「其實平時都老作開唔使特登問我嘅」等等。
脷伸（利益申報）先，問佢嘅唔係香港文匯報呀。身為事件主角的河童喺開地球post時，就開咗份報紙名，仲好寸嘴咁話「××日報：口罩=暴動物資」咁。袁嘉蔚就留言：「下次我掃地同你（××日報）講聲。」
「中箭」友「Kyle Chau」則揶揄：「×，聽日就開返個post洗廁所，free廁紙，我捐100卷，照顧下青少年身心健康。」
「黃盛輝」留言稱：「口罩都係暴動物資；咁全港醫院診所都要查封啦。」「Kelvin Cy Chan」則稱：「原來全世界醫院診所都是暴動基地。」負責幫「青症雙邪」Cheap禎管理fb個前「學民思潮」成員李宗澤，就留言話「某類記者智商只有30」喎。 ■香港文匯報記者 羅旦