■鍾琬媛發「退熱帖」，宣佈離開「熱狗」。fb截圖自從大玩「清算」之後，走吓一個走吓又一個，今次仲走一個選過立法會嘅人，好難令人唔覺得佢哋內部出問題。拍過「熱狗」副主席四眼（鄭錦滿）出選港島嘅鍾琬媛（Bonix），噚日宣佈退出「熱狗」，雖然無交代點解，但唔少唔妥「熱狗」嘅網民，索性幫佢安咗「退熱保平安」呢個原因，搞到「熱狗」鬼鍊咁嘈，最後都係上演一場《小學雞齊嗌交》！
鍾琬媛噚日喺facebook發咗個「退熱帖」，話自己搞掂晒啲手尾之後，就會離開「熱狗」，並「感謝」多年嚟共事過、支持過佢嘅人喎。
佢無鬧住走，人哋自然畀返兩分薄面佢，好似「熱狗」主席蟲泰（鄭松泰）就叫佢加油，仲叫佢記住「成功之前，絕對不要放棄夢想」呢句「熱狗」名句，但蟲泰轉過頭嚟就畀（俾）「Jane Checketts」叫佢唔好再想當然，話Bonix如果想繼續「追夢」，就無必要離開「熱狗」，霸道到呢！至於共事過嘅四眼，噚日竟然無任何表示。
成班「反熱」網民仆到去佢fb度恭喜佢，又話「退熱保平安」，又話「唔通陪你（『熱狗』）清蒜（清算）咩」，有人仲些牙（share，分享）咗英文老歌《Congratulations》。
「熱狗」睇唔過眼反擊，好似「夏霽」就話：「幾多×樣出來抽水......得喇得喇！你哋想人哋係反面決裂，好明顯㗎喇！可惜事實唔係，唔啱你哋班小人嘅期望，你班×樣想撥火搞事，都冇用㗎！明唔明呀？白痴！」
「反熱」嗰邊亦都抵唔住頸，「安隆」批評「熱狗」平時都係食人花生，「但同時又唔準我地（哋）食花生，起哂（晒）鋼（螯）咁款，死『熱狗』真係霸道，收一收皮好嗎？......不過離開『熱血公民』的確係客觀事實，我地（哋）主觀為佢離開呢個惡貫滿盈嘅組織感到開心！吹咩？」
網民勸「遠離政治做實事」
罵戰睇得多，不如睇吓清泉，「Johnny Yip」就叫Bonix「遠離政治，做實事改變社會」，呢啲咪係人講嘅嘢囉！ ■香港文匯報記者 陳庭佳