元朗食肆「文樂美食小炒王」早前俾人屈佢賣狗肉，俾啲反對派又報警又報食環署去「招呼」，當中有散播謠言嘅「本土行動」何來，仲有幫手叫網民「廣傳」加「搜證」嘅元朗區議員、民主黨鄺神（鄺俊宇）添。不過，食環嘅化驗結果前日就出爐啦，「小炒王」喺facebook度貼咗出嚟，證明自己真係賣羊肉。唔少網民就理直氣壯追數，tag（標註）埋鄺神同何來叫佢哋道歉交代，但兩人都冇回覆過，有網民就建議店主︰「係時候要從法律途徑追究名譽損失！」咁又係，抽啲咁嘅水去害人，唔使還咩？
「指羊為狗」懶理被tag拒道歉
成日黐住「自決派」朱凱廸搞保育、行「動保」路線嘅何來，早前喺fb專頁「動物生命糾察隊」出文，話「小炒王」賣狗肉，仲貼埋相去「指羊為狗」，同時言之鑿鑿話已經有3個專家都係咁睇。
話都冇咁快，鄺神唔係第一時間搵「小炒王」了解，而係第一時間喺fb出篇靠害文，話自己「搜証（證）中」、「已去信警方促調查」、「請各位協助廣傳訊息」。
雖然件事漸漸水落石出，鄺神一度諗住落去餐廳食餐飯影張相，同老闆扮老友當冇事，當時好多網民已經對佢呢種無賴態度不滿，前日「小炒王」貼咗食環化驗結果，強調「我地（哋）賣的是羊肉」，網民就再一次向鄺神同何來追數，要求兩個人道歉，仲tag埋佢哋添。
「蔡仲賢」就問︰「屈人係狗肉果（嗰）班人肯出嚟公開道歉未？」「Pierre Cheung」就揶揄︰「車禍害人，影響一生，未有証（證）據時，咪跟！道歉啦！你班×人。」
鄺粉甩鍋：最狗係何來
不過，你又點叫得醒扮瞓嘅人吖，兩個人當然冇覆，有網民去何來個「動物生命糾察隊」fb專頁度出文，仲俾人「關閉貼文回應功能」添。
難為鄺神嘅fans（支持者）仲要幫佢兜。「Chun Yu Cheng」就「棄何保鄺」話︰「鄺俊宇認左（咗）衰仔啦，最×街係何來， 禮（戾）橫折曲， 死不悔改。」「Aegis Cheng」就鄺神無賴mode上身話︰「鄺俊宇冇一口咬定係狗肉，叫人幫手查證喎。」
當人傻㗎咩？「夏紫晨」就指出︰「佢係叫人搜證，件事未查清就叫人廣傳。」「HO Karen」就話︰「個逗號人（鄺神）邊有道歉？重（仲）要落去抽水扮無事發生呀！」「Alan Wan」亦同鄺神fans鬥無知話︰「鄺神幾時認衰仔？有新post？」
市民挺店主法律行動追究
網民亦都建議店主唔好忍佢哋，一於採取法律行動。「Wendy Ng」就話︰「果然水落石出！係時候要從法律途徑追究名譽損失！」
「夏紫晨」講得再白啲︰「係時候告何來同鄺俊宇啦。」「Trixia Pat」亦話︰「支持老闆告譭謗。」 ■香港文匯報記者 甘瑜