■狗達宣佈「熱血少年軍」摺埋。 fb截圖嚟緊星期六就係「熱狗」喉舌《熱血時報》5周年台慶嘅「匯演」。「熱狗」嘅過氣「首領」狗達（黃洋達）率先為大家帶嚟喜訊：教壞細路嘅「熱血少年軍」維唔到皮，將會摺埋！狗達仲將責任卸落已經同佢擘咗面嘅狗主（黃毓民）身上，話因為同對方分裂，搞到《熱時》今年運作非常吃力，既要喺聯播節目中畀埋對方嗰份，又要唔知點解喺各方面都俾人投訴，要花人力物力去處理。一眾「熱狗」haters（仇家）當然熱烈地彈琴熱烈地唱啦，但都有心水清嘅網民覺得唔係咁簡單，要提防「熱狗」賣小強呃課金。 ■香港文匯報記者 陳庭佳
狗達前日同主理「熱血少年軍」嘅「英軍」一齊做節目，宣佈由於經營困難，成立咗年幾嘅「少年軍」要「暫時休業」。佢先認衰仔話自己計錯數，承認《熱時》喺舊年過度擴充，而「熱血少年軍」恒常運作亦都係舊年年尾嘅決定，甚至諗過增加人手。不過《熱時》運作去到今年相當之吃力，「有少少喺年頭無預算過嘅狀況。」
講到呢度，衰仔就認完嘞，狗達開盡火力數臭狗主，話《熱時》蒙受同狗主分裂呢個最大打擊，營運壓力亦都因此出現，年頭忽然負擔一筆額外開支，原本同狗主個網台「MyRadio」合作《大香港早晨》呢個節目，但因為對方喺措手不及嘅情況下退出咗聯播，為咗維持節目運作，要畀埋對方嗰份。
賴狗主鬆人要畀多份錢
咁都未算，狗達又賴自從分裂之後，「（《熱時》總部）消防又俾人投訴，屋宇結構又俾人投訴，online（網上）商品又俾人去消委會等等投訴，無日無之咁發生」，搞到佢哋要畀錢換過套灑水系統，又要花人力物力去處理投訴，再加上「少年軍」嘅竇口觀塘地區辦事處俾人加租，原本用緊嘅Livestream串流又加價，搞到佢哋要自己整過套系統，「如果無大香港早晨、畀（俾）人投訴同加租嘅開支，或者都可以support（支持）到（『少年軍』）。」
賴完狗主、賴完加租，狗達再賴負責「軍訓」嘅「英軍」要搵食，無辦法全職管理「少年軍」，決定係時候要為《熱時》瘦身，摺埋觀塘地辦，用緊地辦嘅「少年軍」同「體育救世」都唔玩嘞，相信開支會大幅度減輕，仲喺台慶前夕畀定大家心理準備：《熱時》隨時都會執笠。
催促粉絲磅水買台慶飛
狗達講開「節流」又點會唔講「開源」呀？佢話《熱時》台慶「匯演」賣飛聽日就截止，叫一眾「熱狗」速磅喎。睇返資料，佢哋喺九龍灣國際展貿中心租嗰個場，最多都只係容納600人。《熱時》唔係「萬人台」咩？乜搞到600張飛喺開騷幾日前都去唔晒？
不過，狗達摺埋「少年軍」呢單嘢都好可疑：「少年軍」上個月都仲有活動，帶細路去玩室內攀石，上星期六都仲好哋哋做節目，班細路仲作咗首歌諗住喺「匯演」度表演𠻹。
黐開狗主嘅「無敵神駒」仇思達，就唔理咁多，一於喺facebook發咗「賀電」先：「距離『熱狗』全面收皮的日子又向前邁進了。『熱狗』一小步，人類一大步。」
但都有人覺得要提防提防。「張艾草」就話可能係殘獸胃（陳秀慧）想旅行，賣小強谷呃課金，「旅行完畢便會『強』勢回歸再利用小朋友了。」
「Milk Tea」就認為狗達可能覺得「少年軍」呢條水已經無肉食，「以佢兩公婆咁契弟，第時一定會巧立名目又開新計劃呃錢。『熱狗』未正式收皮前，絕不可以掉以輕心。」