■毛孟靜在fb宣佈，自己與范國威在「D100」的節目被摺埋。 fb截圖摺埋節目呢樣嘢，又點止係「熱狗」專利吖？好似作為主流反對派喉舌嘅網台「D100」，最近亦都摺咗「香港本土」立法會議員毛婆（毛孟靜）同「新民主同盟」咖喱飯（范國威）嘅節目。
毛婆同咖喱飯前晚喺facebook出咗張喺直播室嘅合照，話佢哋個節目《毛范本土》當晚係最後一集，一眾「黃絲」弱雞上身係咁問「點解嘅」，有人就話據傳係削減成本，因為「D100」收嘅課金越嚟越少，喺數碼港嘅竇口又俾業主加成三成租。
聽返啲市場消息，加租就係真嘅，而一直獲「D100」免費借出辦公室嘅英文網媒《HKFP》，最近亦都搬去堅尼地城一幢工廈，唔知係咪因為「D100」將加租轉嫁畀佢哋而「分家」呢？
至於削減成本就仲簡單，邊個節目無人聽咪摺邊個囉！如果係咁，咖喱飯喺出年立法會新東補選都幾勢危！ ■香港文匯報記者 陳庭佳