■邊個叛變邊個？有網民覺得係狗達「賤人叛變」。 fb圖片《熱血時報》台慶蝕到空虛得200友去，攬往《熱時》諗住延續影響力嘅「熱狗」過氣「首領」狗達（黃洋達）梗係唔多高興啦，不過以佢性格，又點會覺得《熱時》同「熱狗」搞成咁係自己出事吖，於是就賴咗落去狗主（黃毓民）同佢擘面嘞。本來上個星期佢都係形容呢壇嘢係「黃毓民分裂」啫，點知轉個頭佢前日就講成「黃毓民叛變」，自然俾狗主嗰邊砌妗L大無細、唔識莊閒啦，不過狗主啲親衛兵質素有限，好快又俾「熱狗」咬返轉頭，又嚟一場腥風血雨嘅網戰！
狗達前日朝早喺《熱時》節目度，講講吓出年年宵縮皮去旺角花墟搞嗰陣，無啦啦講到去今年書展，佢話今年係「黃毓民叛變」之後嘅第一個書展，「事實上對我哋嚟講個打擊都大嘅，最主要就係心情上面、精神上面打擊」，但一眾「熱狗」嘅支持「完全無受影響」喎。
佢仲話狗主嗰邊最主要嘅攻擊就係令到佢哋困擾，「然之後抹黑呀、講大話呀，等你疲於奔命去解釋呀」，雖然「熱狗」決定理都唔理，但點都要處理支持者同《熱時》同事，疏導吓�哋情緒，令佢哋唔好處於一個咁困擾嘅狀態。
「神駒」「殘獸」互罵 又性器又黑金
「契爺」俾人搞，「無敵神駒」仇思達又點會唔出聲吖？神駒鬧爆狗達欺師滅祖、喪心病狂，「明明是黃洋達利用『水泥隊』（瘋狂留言撐『熱狗』嘅網民）對毓民、『MyRadio』，以及一眾『本土派』人士唱衰、謾罵、中傷足足一年，導致聲名狼藉、眾叛親離；如今竟可反過來指控恩師『叛變』，實在天地不容。如此背信棄義之垃圾組織，人人得而誅之！」
狗達個太座殘獸胃（陳秀慧）護夫心切，寸神駒都係聽《熱時》節目先知得咁清楚，「呢位聽眾，老屈抹黑煽動做得相當出色，錢記得袋穩。」
此話辣着咗最憎人話佢收錢（但唔知係咪）嘅神駒：「我幾時收錢？收邊個錢？收幾多錢？你有無證據呀臭×？開口埋口淨係識×叫『抹黑』，明明係證據確鑿，加埋你個廢柴老公自行招認，都可以扭曲成『抹黑』。」
狗達膺「食屎狗」 狗徒：叛變又點？
由社民連、「人民力量」同「普羅」年代都跟住狗主嘅「鹵味男」錢偉洛，亦都非常火滾，用「食屎狗」稱呼狗達，叫佢做人要分吓莊閒，「教主叛變，使唔使要教主跪喺你呢隻食屎狗面前，叩頭道歉？」
不過，鹵味男咁講，咪即係承認作為前輩嘅狗主背叛後輩狗達？於是就俾黐開「熱狗」嘅「三國人物」，包括「劉禪」等寸佢係「傑出員工」：「老闆請你返來，除咗篤爆佢叛變之外，仲要推佢去跪。得此員工，反映呢間公司（『MyRadio』）好明顯陷入經營困境。」
神駒個「益友」「Jojo Wu」慌死其他人瞓咗無聽狗達朝早講乜，就好有心咁拍低自己個mon（屏幕）播住嗰十幾秒精華，片末仲隊埋隻「靈犀一指」出嚟以示不滿。呢幕就令網上遊魂「藍鳳凰」諗起今年書展：「做得『益友』多少智商有問題，對住條片舉中指，同書展嗰時，去離人（《熱時》）攤檔九里遠嘅廁所門口食熱狗有咩分別？又要搞人又要縮骨，冇鬼用。」
月底就係感恩節嘞，未訂火雞唔緊要，睇佢哋兩邊鬥咬，食花生都食飽！
■香港文匯報記者 陳庭佳
