■陳倩揚、梁嘉琪出席頒獎禮活動。香港文匯報訊（記者 植植）黎芷珊、陳倩揚、梁嘉琪等到尖東出席頒獎禮活動，她表示去年曾擔任表演嘉賓，今年再獲大會邀請以大使身份撐香港中小企業，她透露知道做生意要突破好多難關，要有資金同脈絡，做生意最緊要識人，現在還利用社交媒體，即時應對客戶需求。
講到取經做生意，倩揚表示一直有經營護膚品生意：「不過今年比較忙，都係喺興趣上營運吓先。（叫老公出錢做大點？）都可以，但我覺得時間大於金錢，除咗生意仲有好多工作，同埋要照顧小朋友，他們仲細，屋企嘅比重會大啲，不過做生意都帶畀我好多成功感。最緊要係有熱情同興趣，作為媽咪時間分配都係一項課題。」
黎芷珊為其太陽眼鏡品牌領獎，芷珊表示今次特登來領獎，雖然個品牌都做咗兩年，都好開心可以有獎項去肯定。始終自己係由藝人轉型做生意，當時由設計、搵廠商、經營等等都一腳踢。
問到身為藝人做生意會否有優勢？芷珊表示：「都有，因為我用咗自己個葡文名做牌子，好多人都唔識讀，會話係『芷珊姐姐個牌子』，感覺自己好似做咗一個生招牌，都開心！加上自己有好多藝人朋友，大家都好支持我，令個品牌好快在社交媒體傳開去。」