■傻根寸「本民前」收檔。 fb截圖西瓜琦（梁天琦）退出，偉哥仰（黃台仰）同爭啲噏唔出佢個名嘅李東昇又疑似着咗草，「本民前」三條支柱一下子無晒，不過因為選票等種種利益而同「本民前」擘面嘅「熱狗」，班大粒嘅亦都唔見�哋熱烈地彈琴熱烈地唱，相反「下面反應好大」，班細嘅寸西瓜琦「搵夠就收」，搞冧「本土派」嘅任務完成喎。
「熱狗」過氣「首領」狗達（黃洋達）前日喺facebook些牙（分享）《熱血時報》嘅有關報道時，就乜都無講過，而佢太座殘獸胃（陳秀慧）亦都只係講咗句「是但啦」。
最多嘢講嘅就係舊年選舉同西瓜琦比較多摩擦嘅「城邦派國師」傻根，先嚟一句「『本民前』收檔了」，再提返西瓜琦之前講過希望「唔流血而得到民主」，答案就係佢嘅「永續基本法」，只係舊年選民唔識貨，「不過也不要再想，陳雲haters（仇家）也不要再罵陳雲。」
西瓜琦退黨原因係希望喺審訊前「陪伴至親」，不過就連佢自己亦都親口講過，佢同兩老感情唔深喎，「YK Keung」就鬧佢「正一冚×剷，借父母過橋嚟博個官同情」！ ■香港文匯報記者 陳庭佳