■劉國勳在fb發帖澄清。 劉國勳fb截圖以前就天下事事都因為傻根（城邦派「國師」陳云根），估唔到𠵱家變成新東政策都因為秀賢。事緣民建聯立法會議員劉國勳前日再次要求當局豁免公共交通工具隧道收費，以減低巴士車費價格，點知有意參加新東補選嘅學聯前常委張秀賢即刻話人抄佢，仲貼埋自己舊年11月24日篇文出嚟做「證據」。劉國勳見狀都唔知好嬲定好笑，只好同佢講「唔通我識如來神掌又話過你知咩」，再貼返自己舊年6月已經開始爭取嘅證據，仲贈佢兩句話︰「臨近補選，明白要谷下（吓）人氣，我都樂意幫你推一推，不過下次拾人牙慧之前，請先做好功課。」
張秀賢噚日喺facebook出文，話劉國勳上咗佢隻船，「認同秀賢我早前有關巴士減價嘅政策倡議」，然後就寸劉國勳「唔好淨係大隻講但又唔落力推，最後得咗就扮成功爭取啦」，再加上「政策剽竊就冇得舉報嘅」、「政治抄抄子」等hashtag（標籤），擺明話人抄佢。
爭九巴減價 有圖有真相
劉國勳都唔知好嬲定好笑，喺自己個fb度澄清，再喺張秀賢個post留言，問佢︰「唔通我識如來神掌又話過你知咩？」劉國勳話，見到張秀賢個post，「望一望標題當堂嚇一跳，睇完得啖笑。」
其實，劉國勳早於去年已多次喺立法會發言提出、與運輸署及巴士公司商討跟進、再夥拍黨友鄧家彪召開記者會等，佢貼出有關文書往來話︰「運輸署和九巴都分別回覆指會仔細考慮我的意見（有圖有真相），背後種種的工作，並非紙上談兵。」
雖然張秀賢係咁話人抄襲，但劉國勳都冇計較幫佢推一推人氣，貼埋張秀賢原post出嚟，等大家可以去睇清楚佢為人囉。劉國勳仲加咗幾個抵死hashtag，話佢「衝出黎（嚟）」、「幫張同學推人氣」、「下次要好好做下（吓）功課」、「求其抽一封回信都早過11月24日」、「要求豁免公共交通工具隧道收費」、「講左（咗）又做左（咗）」。
網民「Mokwan Chung」亦去咗張秀賢個post度留言問︰「得你先識諗？」「Thomas Ng」就揶揄︰「而我不知道張秀賢是誰。」 ■香港文匯報記者 甘瑜