「熱血公民」主席蟲泰（鄭松泰）就嚟冇咗個教席，要跌落地拿返渣沙，最緊要識Spin（扭）。話說蟲泰倒插國旗、區旗明顯係小學雞侮辱行為，但「熱狗」就係有勇氣出嚟亂噏一輪，話蟲泰係為咗「掩護」「青症雙邪」嘅的士梁（梁頌恆）同Cheap精（游蕙禎），然後轉移視線話「青症」班人唔識感恩，仲恥笑埋蟲泰一份添。
「本土派」互諷互貶
「熱青城」中人「藍鳳凰」噚晚喺facebook出文，希望幫蟲泰塑造高大背景，再轉移視線去「青症」班人度，佢竟然咁講︰「即使旗子案係鄭松泰為掩護梁游而引發，『本民』、『青政』都即時幸災樂禍。」然後附埋一班人恥笑蟲泰嘅cap（截）圖，想引起公眾同情蟲泰咁。一班「熱狗」就圍爐取暖，話以後要有仇報仇咁話。
嘩，倒轉支旗就可以掩護人，你估蟲泰又係國師識開壇作法咩！究竟蟲泰係咪真係想倒旗「掩護」「雙邪」呢？同大家重溫返一次蟲泰之前喺「熱狗」工作組所發表嘅工作匯報係點講啦。
根據當時嘅錄音，蟲泰就話︰「喺（前年）9月至到去（舊年）一二月，梁頌恆、游蕙禎呢啲，×你，呢啲�哋應該死啦冚×剷（指應被取消議員資格）！但問題係，我喺公眾場合嚟講，我唔可以（咁樣表態），我要同佢哋扮friend（朋友），我要喺我嘅立場上係要顯示得到，畀其他人知道我哋係幫緊佢，因為大眾白痴呀嘛！佢哋以為我哋係『本土派』嚟㗎嘛，你明唔明呀？『本土派』同一陣營嚟㗎嘛，有人以為我哋係『青年新政』嚟㗎嘛！」
呢段精彩嘅「公眾係白痴」錄音，大家都仲記憶猶新，似乎班「熱狗」都真係當大家係白痴喎。 ■香港文匯報記者 甘瑜