■維他奶指正研究有關行為是否涉嫌侵犯公司知識產權。 fb截圖抄，全部都係抄！自稱「基於政治現實」而唔認係「獨」派中人嘅劉頴匡，近日喺fb上載招募義工隊嘅帖文，但其中一幅圖就同維他檸檬茶包裝幾乎一模一樣，唔細睇仲以為維他支持佢𠻹！有「熱青城」中人就批評佢抄襲，話要告畀維他奶知。不過，有人就估佢就係想啲宣傳品因此而被DQ，到時又可以扮「被迫害」，得咗！維他奶就當然唔理你啲政圈爭拗啦，回覆網民時強調自己同劉頴匡一啲關係都冇，研究緊有冇俾人侵犯版權。
劉頴匡喺帖中話要「招募VLT成員」，VL即係佢英文名，T就for Team，話自己「唯一可倚仗的只有所有真誠捍衛『本土』的各位市民和朋友」，所以要招人加入其團隊，一齊開設街站、向街坊宣傳，或是成為出設團隊，協助製作宣傳品，定必要壯大「本土派」的聲音云云。
選舉時招人就成日都有嘅，但佢帖中用嗰幅圖就同維他奶其中一款檸檬茶嘅包裝幾乎一樣樣。一直最唔妥「偽獨潮童」嘅「熱青城」中人「藍鳳凰」就截佢圖發帖，話：「乜『獨』派『五層脂心腩」』圓咕碌（中大學生幹事會幹事黃于喬）條仔劉頴匡抄得咁揚呀？」
網民鬧無恥 政敵援例狙擊
佢仲引述法例，話根據2014年版權條例6項版權豁免，即「二次創作」修定豁免，只係包括戲仿、評論時事、引用、教學、聯線服務提供者暫時複製版權作品同聲音記錄的媒體轉換，「好明顯劉穎（頴）匡嘅宣傳品，係抄襲，而唔屬於二創。」
「藍鳳凰」仲發起自己友email去維他奶國際集團有限公司話有人侵權。「廢除雙重國籍行動」fb專頁更發起話：「可以email問下維他奶集團與劉穎（頴）匡合作搞『港獨』背後嘅理念。」
「Nome Li」批評道：「學校功課就話抄，出到黎（嚟）社會做野（嘢）可唔可以唔好咁hea咁無恥！」「Lee Sonny」指，「係咪可以告人，侵犯人哋版權嗰啲㗎？」「Mak Stephen」就話：「維他國際絕對可以告佢。」
「Patrizio Wolf」則突破盲腸：「就佢當二次創作，但選管會應該唔比（畀）咁出街， 然之後佢又話會政治打壓有（又）dq（DQ）又盛咁樣囉！」
維他奶撇清關係研涉侵權
維他奶方面就唔理政圈爭拗嘅，但真係有網民走去問佢係咪支持劉頴匡喎。有網上圖片就顯示，維他奶回應時強調自己同劉頴匡一啲關係都冇，「我們正研究有關行為是否涉嫌侵犯公司知識產權。」 ■香港文匯報記者 羅旦