前年選舉收咗檔、今次補選想喺新界東捲土重來嘅「新民主同盟」咖喱飯（范國威），除咗俾人寸佢死霸爛霸立法會議席呢個「關愛座」，原來佢仲好關心自己筆「生果金」。佢日前先呻自己前年選舉啲資助仲未攞到手，仲賴前「本土民主前線」發言人西瓜琦（梁天琦），不點名話最衰佢提選舉呈請搞成咁，但講講吓就叫人課金支持佢玩補選嘞。有網民唔妥佢收唔到數走去怨被DQ者，又質疑佢橫掂之後有資助，點解唔自己科水玩補選先，仲有啲課金係用喺選舉定落佢袋。
咖喱飯前日喺facebook「訴苦」，話因為前年選舉當中，新界東「有人」提出選舉呈請，所有得票過5%嘅候選人，要等呈請有結果先可以拎返每票14蚊嘅資助，而呈請拖咗年半仲未有定案，所以至今自己都未拎得返高達45萬嘅資助喎。佢又話今次又有人打算提出選舉呈請，「分分鐘又會有幾十萬選舉資助唔拎得返，慘情。」
講咁多，其實就係想宣傳自己個眾籌「捐款齊撐咖喱飯計劃」，想大家明白佢嘅「苦況」，又聲稱選舉後有剩錢會捐畀慈善團體，唔會留畀「新民主同盟」用喎。
不過呢，反對派貪錢呢樣嘢係人都知㗎啦，好似fb專頁「無神論者的巴別塔」的「塔主」、中大講師劉正，就心水清「突破盲腸」：「選舉呈請如果判咗落嚟，嗰幾十萬最後又袋入你自己荷包......咁咪好×着數？」
「一個仙唔出 hea做袋兩球」
另一個專頁「泛民可恥行為事件簿」亦質疑咖喱飯成日籌籌籌，逢集會就籌，但仲要成日話無錢，仲有就係從來無公開交代過錢用咗去邊，寸佢唔只愛抽水，更加愛cap水（搶錢）。
得知咖喱飯嘅「苦況」，不少網民都睇唔過眼，「Patrick Ng 」就話：「自己一個仙都唔使出，要人籌旗畀佢，入到去又咪係第二個病蟲泰（鄭松泰）乜都做唔到，hea做年半又可以袋成兩球嘢，屎都食啦。」「Or Wing Kit 」留言話：「做雙料議員嗰陣買咗樓要供，好貴呀。」
當反對派乞錢成癮，班黃絲盲粉幾時先睇清「眾籌」嘅真面目？ ■香港文匯報記者 范童