反對派抹黑廣深港高鐵「一地兩檢」安排，其中一個危言聳聽的講法是港人一入內地口岸區，就連上fb打卡都會被內地執法人員拘捕，民主黨更涉嫌偷片惡搞韓國電影《屍殺列車》的一幕，侮辱內地執法人員為喪屍。不過，反對派經常搞內地團，有冇人俾「喪屍」咬過呢？冇囉！全國政協副主席梁振英昨日喺fb發帖，揶揄這批反對派議員，在「一地兩檢」實施後相信都會高高興興搭高鐵，自己之前講到世界末日咁、所以要拚命阻撓一事就當冇發生過囉！
fb發帖批評無恥行徑
反對派在前日立法會會議上出盡吃奶之力阻撓「一地兩檢」條例草案通過二讀，包括由公民黨議員陳淑莊提出中止待續。民建聯議員蔣麗芸當時攞咗香港文匯報去年10月《反對派邊抹黑邊搵食》，批評佢哋「邊抹黑邊搞高鐵團」。咁又係呀，為咗抹黑「一地兩檢」，反對派將高鐵嘅內地口岸形容成隨便可以拉人、無法無天之地，但佢哋帶街坊返內地旅行時，又唔見佢哋一過關就俾人拉噃，冇理由個關口放喺高鐵西九站地底，內地執法人員會突然發晒神經吧？
梁振英昨日就以《『泛民』拉布阻撓一地兩檢 日後會照搭高鐵》為題在fb發帖，首先簡要講一講前日會議嘅情況：「昨（前）晚『泛民』又拉布，因此立法會休會前仍未能按計劃完成『一地兩檢』草案的二讀表決，立法會主席梁君彥會後批評『泛民』議員阻撓法案審議。」
舉阻撓設創科局為例
佢繼續引用「泛民會議」召集人、資訊科技界議員莫乃光嘅說話，話佢會上聲稱梁君彥不當限制議員發言時間，仲話佢哋會繼續堅持「讓未發言的議員可以發言」。
莫乃光呢段說話，梁振英嘅記憶即刻返晒嚟：「莫乃光的批評，令人想起6年前上屆政府向立法會提出成立創新及科技局的建議，被莫乃光和其他『泛民』議員拉布拖延了三年。到了創新及科技局終於成立了，這位資訊科技界的議員竟然可以把『泛民』拉布拖延若無其事，儼然從頭到尾都支持成立創新及科技局。」
佢最後揶揄：「我絕對相信：高鐵通車、『一地兩檢』實施後，莫乃光會高高興興地在西九搭高鐵，今天說的一切，又會再次若無其事。」
網友譏反對派厚臉皮
唔少網民對此都十分認同。「Rox Chan」質問道：「今天反對一地兩檢的人，明後會否在西九站上車？」「Wan Yee」就話：「睇下佢地（哋）係咪咁厚臉皮咯！」「Waisun To」氣憤地說：「日後見到邊一個盲反派去搭高鐵，就一於鏟到佢地（哋）飛起，下一年立法會一個也不要選佢地（哋）。」「Alan Chin」更提議：「希望中央永久全面禁止牠們北上及澳門入境。」 ■香港文匯報記者 陳川