■許智峯屢在區會搗亂，曾4度導致流會。fb截圖民主黨立法會議員許智峯做人一向偏激，喺搶手機事件之前，身為中西區區議員嘅吽A已經經常喺區議會內搗亂。最新一單，係前日中西區議會交通及運輸委員會會議，結果搞到流會。
話說由於議程大塞車，會議只討論其中10項，但許智峯就不滿兼要夾硬增加一個討論項目，其後佢就以政府喺會議前3日先向議員提交喺域多利道增建一個巴士站嘅文件、睇唔切為由大鬧政府。政府解釋係想呢個項目盡快上到立法會審議，先至可以趕及喺今個會期通過。
撩交累流會 阻建巴士站
主席陳財喜其後裁決繼續辯論，許智峯就撩交嗌，大家聲疊聲搞到一片混亂，結果陳財喜認為咁嘅情況冇辦法繼續開會，最終宣佈流會。
中西區區議會副主席陳學鋒批評，增建巴士站本來係一件好簡單嘅事，而文件裡面只得兩行，如果真係想睇嘅幾分鐘都睇得晒，唔應該為咗政治抽水而浪費時間、浪費公帑。佢仲呼籲選民應該諗吓，「呢啲人係唔係仲適合做議員囉！」
「中西區發展動力」fb專頁就發圖發文，話許智峯今屆區議會已經搞到流會4次，質問佢：「搶完手機又搞到流會，你要點先肯收手！」
■香港文匯報記者 陳川