睇世盃忙打機關心女團總選 「一地兩檢」土地政策唔得閒理
反對派講到「一地兩檢」幾咁邪惡、香港土地分配幾咁唔公義，成日話只關心娛樂嘅人係「港豬」，但自己對住世界盃、打機，所有「正義嘅嘢」咪又煙消雲散。好似「中箭」（香港眾志）常委廖偉濂咁，前日下晝先喺土地供應專責小組嘅公眾諮詢會度搗亂，過幾個鐘已經開始追捧丹麥隊球員，佢個黨友羅三七（羅冠聰）亦不斷講波。其他反對派中人，包括「熱狗」（熱血公民）主席蟲泰（鄭松泰）、小麗老千（劉小麗）都係宣傳世界盃資訊，落足力去「培養港豬」，似乎已經冇人記得「一地兩檢」。咁好心佢哋之前就唔好起勢鬧人啦，回力鏢唔痛㗎咩？ ■香港文匯報記者 甘瑜
一班反對派講到「一地兩檢」咁可惡、旺暴判刑咁不公、土地政策咁有問題，但佢哋一邊悲憤，另一邊依然可以好似自己所形容嘅「港豬」咁專注娛樂㗎。數一數佢哋喺「咁黑暗」嘅時期做咗啲咩先。
「中箭」常委朝搗亂夜睇波
「中箭」個廖偉濂日頭去討論諮詢會，仲話自己手指甲都俾保安整崩，但唔緊要嘅，對眼冇事咪得囉，到咗夜晚facebook就係咁追捧丹麥隊球員、大讚冰島球門嘅資訊，幾歡樂呢。羅三七亦都係不斷講冰島龍門資訊，真係天跌落嚟都阻唔到佢哋欣賞世界盃咁。
其他「中箭」成員入面，周庭就呻話俾世界盃洗板，咁佢想講咩呢？原來係想講下日本女團AKB48個總選喎。河童（黃之鋒）就醒啲嘞，講「自由示威遊行」，其實就係直播自己打機，不過起碼叫做識得包裝，成功喺一班「港豬」入面跑出，贏個豬鼻咁啦。
老千吹雞上街睇波
再望下其他反對派做緊乜。鴿黨個李偉峰就連同涂謹申出咗張海報，大大隻字講「世界杯（盃）靚仔球星逐個捉」，真係好務實。小麗老千就最有行動力，號召群眾但唔係反「一地兩檢」，而係一齊喺街頭睇世界盃，話咁樣「氣氛更好」喎。
「青年新政」個Cheap禎坐緊監，但係佢個男朋友林肇彥依然興奮睇波，仲鬧爆撲唔到波嘅西班牙龍門，應該都係因為Cheap禎適應得好好唔使佢擔心啦。蟲泰亦都喺fb到轉貼世界盃資訊，鴿黨羅健熙就呻話今屆世界盃冇佢個荷蘭愛隊。成班反對派政界人士用世界盃洗版嘅情況，真係仲墟冚同齊心過佢哋反「一地兩檢」。乜「一地兩檢」好有問題咩？睇佢哋fb真係唔覺喎。