有別於反對派中人轉個頭就唔記得「一地兩檢」猛講波，民建聯立法會議員鄭泳舜講波嘅同時，就記得要提下年輕人唔好沉迷賭波，又話民建聯建議將合法賭博年齡提高至21歲，以免年輕人過早被賭博氣氛影響。嗱，做議員又點可以只講波唔做實事呢？
鄭泳舜噚日喺facebook上載短片，同大家講波，一開始就考吓大家，問世界盃最年輕上陣嘅球員係邊個，再同大家講年輕人賭波問題。佢話，賭波有年輕化趨勢，而且愈嚟愈嚴重，喺資訊科技發達嘅年代，只要用手機就可以投注，令青少年更易接觸到賭波活動。
佢又表示，香港嘅合法賭博年齡係18歲，但為免青少年沉迷賭博，民建聯就建議將合法賭博年齡提高至21歲。另外，其實鄭泳舜今年5月已經喺立法會會議上提出過質詢，問政府當局點樣遏止青少年賭風蔓延。
佢又引用「波係圓嘅」呢句金句，形容球賽未到最後一秒也不知誰勝誰負，與其受到賭波「勝負」嘅情況影響，倒不如大家開開心心，一齊欣賞比賽好過啦。■香港文匯報記者 鄭治祖